Шетелдіктерді елге заңсыз кіргізумен айналысқан қылмыстық топ анықталды

Шымкентте полицейлер заңсыз көші-қон арнасын тоқтатты,- деп хабарлайды Opennews.kz ақпарат агенттігі Sputnik.kz сайтына сілтеме жасап. 

Полиция жүргізген жедел-іздестіру іс-шараларының нәтижесінде Шымкент қаласында заңсыз көші-қон арнасын ұйымдастырған қылмыстық топтың қызметі әшкереленген. Тергеу барысында күдіктілердің ақшалай сыйақы үшін шетел азаматтарының Қазақстан аумағына келуін ұйымдастырып, оларды заңсыз түрде тіркеуге қою және құжаттарын рәсімдеумен айналысқаны анықталды. Сонымен қатар олардың жалған құжаттар дайындап, көші-қон заңнамасын айналып өтуге көмектескені белгілі болды. Заңсыз әрекеттер жүйелі түрде жүзеге асырылып, белгілі бір схема арқылы жүргізілген. Қазіргі уақытта аталған дерек бойынша қылмыстық іс қозғалып, күдіктілердің өзге де заңсыз әрекеттерге қатысы тексерілуде. (ВИДЕО)

Құқық қорғау органдары заңсыз көші-қонды ұйымдастыру ауыр құқық бұзушылықтардың қатарына жататынын ескертіп, мұндай әрекеттер үшін қылмыстық жауапкершілік қарастырылғанын атап өтті.