Әуежайда шетелдік азаматтан 11 кг гашиш майы тәркіленді

Қазақстанда есірткі контрабандасына қарсы күрес аясында ірі көлемдегі заңсыз жүк анықталды,- деп хабарлайды Opennews.kz ақпараттық агенттігі Baq.kz сайтына сілтеме жасап.

Жедел-іздестіру іс-шаралары барысында полиция қызметкерлері Қазақстан Республикасы Ұлттық қауіпсіздік комитетінің Шекара қызметі өкілдерімен бірлесіп, Бангкок - Алматы бағыты бойынша келген рейсті тексерді. Нәтижесінде 20 жастағы шетел азаматы ұсталған. 

Жеке тексеру кезінде күдіктіден жалпы салмағы шамамен 11 килограмды құрайтын гашиш майы салынған 12 пластикалық ыдыс табылып, тәркіленген. Аталған дерек бойынша Қазақстан Республикасы Қылмыстық кодексінің 286-бабы (контрабанда) бойынша қылмыстық іс қозғалды. Бұл бап мүлкін тәркілей отырып, 20 жылға дейін немесе өмір бойына бас бостандығынан айыру жазасын көздейді. Қазіргі уақытта күдікті уақытша ұстау изоляторына қамалған. 

Ведомство мәліметінше, жыл басынан бері елімізде есірткі контрабандасының 57 дерегі анықталған. Құқық қорғау органдары трансұлттық есірткі трафигінің жолын кесу бағытындағы жұмыстарды жалғастырып жатыр.