Жылдамдықты бақылау күшейеді: камераларға қатысты жаңа бұйрық күшіне енеді
Әлеуметтік желіде "жылдамдықты сағатына 2 шақырымға асырғаны үшін айыппұл салынады" деген ақпарат тарады,- деп хабарлайды Opennews.kz ақпараттық агенттігі Sputnik.kz сайтына сілтеме жасап.
ІІМ мәліметінше, әкімшілік жауапкершілікке тарту тәртібі өзгермеген.
"Құқық бұзушылық үшін жауапкершілік бұрынғыдай белгіленген жылдамдықты сағатына 10 шақырымға және одан жоғары асырған жағдайда ғана қарастырылады", – деп түсіндірді полиция.
8-ші мамырдан бастап күшіне енетін бұйрық тек жылдамдықты тіркейтін камералардың жұмысына қатысты екенін атап өтті. Құжат өлшеу дәлдігі мен рұқсат етілген қателік шегін нақтылайды.
"Бұл өзгерістер жүргізушілерге жаңа талаптар енгізбейді және жауапкершілік шегіне әсер етпейді. Сондықтан “сағатына 2 шақырымға асырғаны үшін айыппұл салынады" деген ақпарат шындыққа сәйкес келмейді", – деді ІІМ Әкімшілік полиция комитетінің ерекше тапсырмалар жөніндегі аға инспекторы Ақтоты Боранова.
Полицияның мәліметінше, жалған ақпарат таратқан азамат анықталған. Рудный қаласының тұрғыны сот шешімімен әкімшілік жауапкершілікке тартылған.
