Сөмкедегі пауэрбанк жарылып, блогер ауыр күйік алған

Кеше, 14:30

1 506

Павлодарда фитнес-клубтан шықпақ болған қазақстандық блогердің сөмкесіндегі пауэрбанк жарылып, оны жалын шарпыған,- деп хабарлайды Оpennews.kz ақпарат агенттігі.

Салдарынан қыз ауыр күйік алып, ауруханаға түскен.

Оқиға Павлодар қаласындағы фитнес-клубта жаттығудан кейін болған. Диляраның айтуынша, үйіне қайтуға дайындалып жатқан кезде оның сөмкесінен кенет қою түтін шыға бастаған. Қыз түтінді бірден байқамаған. Ал сөмкені шешуге әрекет жасаған сәтте пауэрбанк жарылып кеткен.

Жарылыстан кейін қызды жалын шарпып, салдарынан оның басы мен қолдары қатты күйген. Фитнес-клуб қызметкерлері дереу көмекке ұмтылғанымен, өртті толықтай сыртқа шыққан соң ғана сөндіре алған.

"Жолда штативты ұмытып кеткенім есіме түсті. Алдымен қайтқым келмеді, ертең ала саламын деп ойладым. Бірақ жиенім дереу кері қайтуымды талап етті", – дейді ол.

Бұл шешім, мүмкін, Диляраны ауыр зардаптардан аман алып қалған. Жарылыс дәл адамдар көп жерде фитнес-клубтың ресепшенінде, қыз аяқ киімін ауыстырып жатқан сәтте болған.

"Телефонымды диванға қойып, тәпішке киіп жатқаным сол еді, кенет бірдеңе тарсылдай бастады. Не болып жатқанын түсінбей қалдым. Айнала мүлгіген тыныштық. Тек жарылыс дыбыстары естіледі. Сол сәтте өз сөмкемнің жанып жатқанын түсіндім", – деп бөлісті ол.

Сөмке иығында асулы тұрған. Жалынның тез тарай бастағанын көрген Диляра оны шешіп алуға тырысқан. Жанып тұрған сөмкені жерге лақтырып, өзі шегінген. Оған фитнес-клуб қызметкерлері бірден көмекке ұмтылған.

"Қызметкер бірден өрт сөндіргішпен өшіруге тырысты. Бірақ сөмке толық жануын тоқтатпады. Ақырында оны далаға шығарып, сыртта әрең сөндірді", – дейді ол.

Кейін фитнес-клуб әкімшілігі жедел жәрдем шақырған. Диляра бастапқыда жарақаттарының қаншалықты ауыр екенін түсінбегенін, тіпті ауруханаға барғысы келмегенін айтады.

"Жедел жәрдем бес минутта келіп, жарақатымды өңдей бастады. Мен жағдайдың қаншалықты ауыр екенін толық түсінбедім. Тіпті жедел жәрдем шақырылуына қарсы болдым. Бірақ айнаға қарағанда – күйген шашымды көріп, өзімді ұстай алмай, жылап жібердім", – дейді ол.

Дәрігерлер оны күйік орталығына жеткізгенімен, кейін ол емін үй жағдайында ата-анасының бақылауымен жалғастыруды жөн көрген.

"Өте қатты ауырды, қолдарым күйіп тұрғандай болды. Оның үстіне сыртта ыстық болды, бұл жағдайды одан сайын қиындатты. Мені бірден ауруханаға жатқызбақ болды. Бірақ мен бас тарттым, аурухананы ұнатпаймын, үйде, анамның жанында болғаным жақсы", – дейді Диляра.

Диляраның айтуынша, оның:

шашы күйген;

қасы мен кірпігі зақымданған;

сөмке асулы болған жағында ауыр күйік пайда болған;

қолтық тұсы, екі қолы және оң білегі күйген;

іш аймағы да зақымданған.

Диляра фитнес-клуб қызметкерлеріне алғыс білдірді. Оның айтуынша, егер олар дереу өрт сөндіріп, жедел жәрдем шақырмағанда, салдары әлдеқайда ауыр болуы мүмкін еді.

"Қызметкерлерге өте ризамын. Олар бірден отты сөндіруге кірісіп, жедел жәрдем шақырды", – деді ол.

Дәрігерлер оның күйіктерін ауыр деп бағалап отыр және сауығып шыққаннан кейін денесінде тыртықтар қалуы мүмкін екенін ескерткен.