Кинотеатрдағы +18 фильмдерге балаларын ертіп келетіндер жазаланады
Елімізде ересектерге арналған фильмдерге кәмелетке толмаған баласын ертіп баратын ата-аналарға қатысты талап күшеймек,- деп хабарлайды Opennews.kz ақпараттық агенттігі Stan.kz сайтына сілтеме жасап.
Заңгерлер жас санаты 18-ден жоғары киноға ұл-қызымен кіретін тұрғындарды кинотеатр әкімшілігі қатаң бақылауға алу керегін ескертті. Себебі бұл әрекет заңға қайшы. Алайда қазір аталған талапты елеп жатқан жан жоқ дейді. Түнгі сеанстарға ұл-қыздармен кіретіндер жұрттың ашуын туғызған. Тұрғындардың бірі мазамыз қашады десе, енді бірі ересектерге арналған фильмдер баланың психикасын бұзады дейді.
“Баламен жүру дұрыс емес. Біріншіден, психикасын бұзады ересектер көретін кино. Екіншіден, ол жылап, берекемізді қашырады. Демалғандай болмайсың”, – деді талдықорғандық тұрғын Айгерім Бекәлі.
Мамандардың айтуынша, ересектерге арналған фильмдерге баламен келуі заңға қайшы. Елімізде "Кинематография туралы" заң барын ескертті. Егер киноның жас санаты 18-ден жоғары болса, бала ата-анасымен келген күннің өзінде де кіре алмайды. Мұны кинотеатр әкімшілігі қадағалау керек деп отыр.
Заң талаптарын бұзған кинотеатрларға 165 мыңнан 330 мың теңгеге дейін айыппұл салынуы мүмкін. Алайда мамандар ең алдымен жауапкершілік ата-ананың өзінде екенін айтады.
