Антистресс ойыншықтан бала химиялық күйік алған

Бүгін, 09:00

1 507

Алматылық Әсел Пак 7 жастағы қызының сквиш ойыншығы жарылып, ішінен аққан гель тәрізді сұйықтық баланың қолын күйдіріп тастағанын айтқан,- деп хабарлайды Оpennews.kz ақпарат агенттігі.

Әсел Пактың айтуынша, қызына үшінші дәрежелі химиялық күйік диагнозы қойылған. Әйел ойыншықтың сатып алынғанын растайтын түбіртекті және барлық медициналық құжаттарды сақтап қойған. Енді ол мемлекеттік органдардан аталған өнімнің қауіпсіздігіне тексеру жүргізуді талап етіп отыр. Әңгіме ішінде гель тәрізді қоспасы бар танымал сквиш ойыншығының көшірмесі туралы болып отыр.

"Ойыншықтың ішінен гель тәрізді сұйықтық төгіліп, теріге жабысып қалды. Сол сәттен бастап ол терімен бірге сыдырылып түсе бастады. Дәрігерлер иық белдеуі мен жоғарғы аяқ-қол аймағының химиялық күйігі деген диагноз қойды", – дейді қыздың анасы.

Сквиш, нидоу және басқа да антистресс ойыншықтары жұмсақ, түрлі түсті әрі қолға жағымды болғандықтан балалар арасында кең таралған. Олар жүйкені тыныштандырып, күйзелісті азайту үшін қолданылады. Алайда психологтардың айтуынша, сырт көзге зиянсыз көрінетін мұндай ойыншықтардың кейбірі шын мәнінде қауіп төндіруі мүмкін.

"Балаларды әдеттен тыс әрі көзге бірден түсетін заттар қызықтырады. Танымал ойыншықты олардың да алғысы келеді. Өйткені бала үшін қатарластарынан қалмай, өзгелер сияқты болып көріну маңызды", – дейді психолог маман.

Санитариялық-эпидемиологиялық бақылау комитетінің мәліметінше, антистресс ойыншықтарына арналған жеке қауіпсіздік талаптары жоқ. Оларға балаларға арналған барлық өнімдерге қойылатын жалпы талаптар қолданылады. Мамандар ойыншық сатып аларда оның сыртқы түрі мен сапасына ғана емес, қауіпсіздігін растайтын құжаттарының бар-жоғына да назар аударуға кеңес береді.

"Елге әкелініп, сатылатын барлық ойыншықтың сәйкестік сертификаты болуы міндетті. Сквиш ойыншығында да осындай сертификат болуы тиіс. Ата-ана ойыншық сатып алмас бұрын сатушыдан осы құжатты талап етуге толық құқылы", – деді Санитариялық-эпидемиологиялық бақылау комитетінің бас сарапшысы Розалина Ермекпаева

Қазір аталған оқиғаға байланысты тексеру жүргізіліп жатыр. Егер баланың жарақат алуына ойыншықтың қауіпсіздік талаптарына сай келмеуі себеп болғаны анықталса, өндіруші немесе сатушы заң алдында жауапқа тартылуы мүмкін.