Туды терезе алдына ілуге бола ма – Жарлыққа қол қойылды
Үкімет мемлекеттік рәміздерді пайдалану ережелерін жаңартқан,- деп хабарлайды Оpennews.kz ақпарат агенттігі.
Құжатта мемлекеттік тудың қайда және қалай ілінетіні егжей-тегжейлі сипатталған және оны пайдалануға тыйым салынған жағдайлар тізімделген.
Негізгі өзгерістердің бірі азаматтардың мемлекеттік туды ілу мәселесіне қатысты. Құжатта енді жеке және заңды тұлғалар туды тұрғын үй және тұрғын емес ғимараттарда, соның ішінде балкондарда ілуге болады деп нақты көрсетілген. Дегенмен балкондарда ол 45 градус бұрышта ілінуі керек.
Сонымен қатар ережелерде мемлекеттік туды пайдалануға рұқсат етілетін шарттар нақтыланған:
жеке тұрғын үйлерде оны кемінде үш метр биіктікте ілуге болады;
ту жерге, еденге, суға немесе басқа беттерге тиіп кетпеуі керек;
егер тігінен ілінсе, ұлттық ою-өрнек үстінде болуы керек;
ту бүтін, таза, өңі кетпеген және зақымдалмаған болуы керек;
Заңды талаптарға сәйкес, туды көлік құралдарының ішінде ілуге болады. Егер ғимараттың ерекшеліктері тудың қасбетке ілінуіне кедергі келтірсе, оны ғимараттың жанындағы бөлек ту бағанасына орнатуға болады.
Құжатта мемлекеттік туды мәдени, спорттық, әлеуметтік немесе басқа да іс-шаралар кезінде коммерциялық мақсатта пайдалануға болмайтыны нақты көрсетілген.
Туды киім, төсек-орын, перде, дастархан, кілем және басқа да жабын ретінде пайдалануға тыйым салу да күшінде қалады. Қасақана зақымдауға, өртеуге, жыртуға, жерге лақтыруға немесе ұлттық рәміздің қадір-қасиетін түсіретін кез келген басқа әрекеттерге тыйым салынады.
Тағы бір өзгеріс спортшыларға қатысты. Мемлекеттік тудың бейнесін спорттық киімдер мен жабдықтарда пайдалануға ресми түрде рұқсат етілген.
Сонымен қатар қаулыда мемлекеттік рәміздерді ресми веб-сайттарда, стендтерде және плакаттарда көрсету тәртібі нақтыланған. Олар біркелкі ретпен орналасуы керек: алдымен мемлекеттік ту, содан кейін мемлекеттік елтаңба және соңында мемлекеттік әнұранның мәтіні.
Трибуналар үшін бірыңғай дизайн талаптары да белгіленді: көк фонда және алтын әріптермен жазылған. Премьер-министр қол қойған жарлық 13 шілдеде күшіне енеді.
