Пойызға билетсіз мінген жолаушы көз жұмды

"Жолаушылар тасымалы" компаниясының мәліметінше  оқиға 13-ші шілдеде  жолаушылар пойызында Қандыағаш – Ақтөбе бағытында болған- деп хабарлайды Opennews.kz ақпарат агенттігі.

Пойыз бастығының айтуынша, жолаушы билетсіз жүрген. Оны вагонға жолсерік мінгізген. Жол үстінде ер адам кенеттен қайтыс болған.

Пойыз Ақтөбе станциясына жеткен соң марқұмның мәйіті қажетті процессуалдық шараларды жүргізу үшін уәкілетті органдардың қызметкерлеріне тапсырылған. Оқиғаға байланысты қызметтік тексеру жүргізіліп, оның қорытындысы бойынша 2 жолсерік пен пойыз бастығы жұмыстан шығарылған. Ақтөбе учаскесінің бастығы мен өндірістік оқыту жөніндегі нұсқаушыға қатаң сөгіс жарияланған. Ал "Батыс" филиалының басшылық құрамына қатысты жұмыстан босатуға дейінгі қатаң тәртіптік шаралар қолдану жоспарланған. Оқиғаның мән-жайын Ақтөбе станциясындағы көліктегі полиция бөлімі тексеріп жатыр. Алдын ала болжам бойынша, жолаушы екі жақты өкпе қабынуынан қайтыс болуы мүмкін.