Анасы қайтыс болған қазақстандық арыз берді
Қазақстандық азамат туу туралы акт жазбасындағы анасының ұлты туралы мәліметті сот арқылы өзгертті,- деп хабарлайды Opennews.kz ақпараттық агенттігі.
Сот "орыс" деген жазбаны "чех" деп түзетуді міндеттеген. Ер адам туған кезде оның анасы акт жазбасында орыс деп көрсетілген.
"Сонымен қатар сот зерттеген құжаттар талап қоюшының анасының ата-анасы ұлты бойынша чехословак пен неміс болғанын растады. Демек, "Неке (ерлі-зайыпты) және отбасы туралы" Кодекс талаптарына сәйкес, анасының ұлты ол туған кезде "чех" немесе "неміс" деп көрсетілуі тиіс еді", - деп мәлімдеді сот.
Бұл ретте мемлекеттік корпорация өзгерістер енгізуден бас тартқан. Әйел қайтыс болғаннан кейін оның жеке деректерін жалпы тәртіппен өзгерту мүмкін болмаған. Бұл іс жүзінде ер адамның өзінің ұлттық тиістілігі туралы мәліметтерді өзгерту құқығынан айырған. Мамандандырылған ауданаралық әкімшілік сот ер адамның талап арызын қанағаттандырған. Жауапкерге оның туу туралы акт жазбасына түзетулер енгізу және анасының ұлтын "орыс" дегеннен "чех" деп өзгерту міндеті жүктелген. Сот бұл жағдайда талап қоюшының өз құқығын қорғаудың басқа жолы болмағанын атап өтіп, шешімді әділдік пен парасаттылық принциптерін ескере отырып қабылдаған. Сот шешімі заңды күшіне енбеген. Егер шешім бір ай ішінде орындалмаса, жауапкерге 50 АЕК мөлшерінде ақшалай өндіріп алу шарасы қолданылуы мүмкін.
