Пауэрлифтингші Гузал Ергешева 8 тамызда Ұлыбританияда көз жұмды
Спортшы түнде ұйықтап жатқан кезінде талмасы ұстап, қайтыс болған. Қазақстандық спортшы және пауэрлифтингші Гузал Ергешева 8 тамызда Англияда қайтыс болды. Параспортшы соңғы уақытта күйеуімен бірге Ұлыбританияда тұрған, - деп хабарлайды Opennews.kz ақпарат агенттігі.
Қаралы хабарды тележүргізуші Әдел Оразалинова әлеуметтік желідегі парақшасында жеткізді. Ол Гузал Ергешевамен 30 жылға жуық уақыт бойы жақын дос болғанын айтты.
Оразалинованың мәліметінше, спортшы түнде ұйықтап жатқан кезінде талмасы ұстап, қайтыс болған. Қайғылы жағдайға дейін бір күн бұрын Ергешева күйеуінің туыстарымен уақыт өткізіп, кейін досымен кездескен.
«Ол жүрегі махаббатқа толы, сүйікті, жарқын, алға қойған жоспары көп және достыққа адал жан еді», – деп жазды Әдел Оразалинова.
Қазір Гузал Ергешеваның отбасы оның денесін Қазақстанға жеткізу мәселесін ұйымдастырып жатыр. Осыған байланысты Әдел Оразалинова әлеуметтік желідегі оқырмандарынан Ұлыбританиядан Қазақстанға репатриация жасау тәртібі туралы ақпаратпен бөлісуді сұрады.
Сондай-ақ ол Қазақстан консулдығының өкілдерімен байланыс орнатуға көмектесуді өтінді.
