Қызылордада той кортежіне қатысқан 15 адам жауапқа тартылды

Қызылорда облысында жол қозғалысы ережелерін өрескел бұзып, қарсы бағытқа шығып, жол апатына себепші бола жаздаған және жол бойында пиротехникалық құралдар пайдаланған той кортежінің қатысушылары анықталды, - деп хабарлайды Opennews.kz ақпарат агенттігі.

Оқиға 23 тамызға қараған түні Жаңақорған ауданында болған. Барлық қатысушы анықталып, полицияға жеткізілген.

Олар - Жаңақорған ауданының, Алматы және Жамбыл облыстарының, сондай-ақ, Шымкент қаласының 21 мен 35 жас аралығындағы тұрғындары.

Олар қарсы бағытқа шығу, жол апаты жағдайын туғызу, қауіпті маневр жасау, көлік жүргізу құқығынсыз және техникалық ақауы бар көлікті тізгіндеу, ұсақ бұзақылық жасау, сондай-ақ, елдімекен аумағында пиротехникалық құралдарды заңсыз пайдалану бойынша жауапкершілікке тартылған.

Сот шешімімен үш жүргізуші көлік жүргізу құқығынан айырылған. Қатысушылардың біріне бес тәулікке әкімшілік қамау жазасы тағайындалды. Қалғандарына әкімшілік айыппұлдар салынды.

Бес көлік арнайы тұраққа қойылды. Барлық қатысушыға мұндай әрекеттерге жол бермеу туралы ресми ескерту жасалған.