Қазақстандықтардың әл-ауқаты арнайы калькулятор арқылы анықталмақ

Қазақстанда отбасылардың материалдық жағдайын бағалау кезінде олардың табысы ғана емес, жылжымайтын мүлкі, көлігі, кәсібі және басқа да активтері назарға алынады. Еңбек және халықты әлеуметтік қорғау министрлігі отбасының әл-ауқатын бағалау тәртібін түсіндірді, - деп хабарлайды Opennews.kz  ақпарат агенттігі.

А және Б санаттарына жатқызу кезінде табыспен қатар мүлік пен басқа да активтер ескеріледі

Министрлік мәліметінше, А санатына әл-ауқаты жоғары, ал Б санатына ауқатты отбасылар жатады. Бұл санаттарды анықтаған кезде отбасының әр мүшесіне шаққандағы табысы мен иелігіндегі мүлік ескеріледі.

А және Б санаттарына қандай отбасылар жатады?

А санатына отбасының әр мүшесіне шаққандағы табысы 7 күнкөріс минимумынан асатын, үлкен аумақты жылжымайтын мүлкі, люкс санатындағы көлігі, бизнесі және басқа да активтері бар отбасылар жатуы мүмкін.

Ал Б санатына әр адамға шаққандағы табысы 6-дан 7 күнкөріс минимумына дейінгі, жайлы баспанасы, премиум санатындағы көлігі, кәсіпкерлік қызметі және басқа да мүлкі бар отбасылар кіреді.

Дегенмен аталған белгілердің біреуінің болуы отбасыны автоматты түрде белгілі бір санатқа жатқызуға негіз болмайды. Отбасының материалдық жағдайы бірнеше көрсеткіштің жиынтығы бойынша бағаланады.

Отбасының әл-ауқаты қалай анықталады?

Отбасының әл-ауқаты Отбасының цифрлық картасы арқылы 50-ден астам өлшем негізінде бағаланады. Олардың қатарында табыс деңгейі, жұмыспен қамтылуы, мүлкі, несиелері және әлеуметтік жағдайы бар.

Сонымен қатар отбасының санаты тұрақты болып қалмайды. Егер отбасының табысы немесе өмірлік жағдайы өзгерсе, оның әл-ауқат санаты да қайта қаралуы мүмкін.