Ақтөбеде коронавирусты емдейтін аурухана жылусыз қалды

Ақтөбедегі вирус жұқтырғандар ем алып жатқан аурухана жылусыз қалды - деп хабарлайды "Opennews.kz" ақпарат агенттігі.

Аурухананың бас дәрігері жылудың жоқтығын айтып облыстық денсаулық сақтау басқармасы мен облыс әкіміне хат жазған. Алайда жауап ала алмағанын айтады.
"Менің және жұмысшылар отыратын бөлмеде қосымша жылыту құрылғылары бар. Бірақ оларды күндіз-түні бақылап отыру қажет. Сондықтан бізге қауіпсіз жылу керек. Мұнда екі корпуста 400 науқас бар. Жансақтау бөлімінде де ем алып жатқандар бар", - деп мәлімдеді облыстық аурухананың бас дәрігері Ерлан Тәтімов. 
Мекеме бастапқыда тек туберкулезге шалдыққандарды емдеген. Коронавирустың өршуіне байланысты аурухана инфекциялық стационарға айналған. Мұндағы пациенттердің басым бөлігі коронавирусқа шалдыққандар екен. 
Мамандардың айтуынша, аурухана бұрын автономдық жылыту жүйесімен жылытылған. Бірақ кейін орталық жылу жүйесіне қосылыпты.