ҚЫЗЫЛОРДАДА САСЫҒАН КӨЛШІКТЕН ТҰНШЫҚҚАН ТҰРҒЫНДАР ШАҒЫМДАНУДА

14 қыркүйек 2022, 16:58

308

Қызылордалықтар сасыған көлшіктерден шыққан иістен әбден мезі болдық дейді,- деп хабарлайды Opennews.kz ақпарат агенттігі.

Қала аумағына қарасты «Әл-Фараби», «Саяхат», «КБИ», «Арай» секілді мөлтек аудандарда пайда болған сасық көлшіктер тұрғындардың тыныстауына кедергі келтіруде. Ал, қалалық әкімдік тарапынан көлшіктерді көму жұмыстары тұрақты жүргізілмейді. Ал, «Сәулет» шағын ауданы бойындағы көлшікті көму жұмыстары жүргізілсе де, одан нәтиже болмауда.

«Сәулет» шағын ауданы тұрғындарының айтуынша, сасық көлшіктен зардап шегіп отырғанына біршама уақыт өткен. Көлшіктің бірі үш жыл бұрын жергілікті әкімдік тарапынан қолдау тауып көмілгенімен қайта жер бетіне шығып, тұрғындардың тынысына кері әсерін беріп жатқан көрінеді.

«Негізінен, сасық су басқан орындар біреуге берілген жер телімдері. Үш жыл бұрын көмілген сасық судың орнына жеке үй салынып, адам тұрып жатыр. Бірақ сасық су қарсы беттегі бос жатқан жердің бетіне шығып отыр», – деді «Сәулет» шағын ауданы тұрғыны Жазира Мырзашева.

Сәулет-31 және 32-ші үйлердің аралығында бос жатқан жер бүгінде үлкен көлшікке айналған. Ал, сасыған көлдің иісі мұрын жарардай. Біле білсек, жер телімдерінің де өз иесі бар. Ол аздық еткендей тұрғындар да күл-қоқыстарын тастайтын орынға айналған.
Ең сорақысы ойын баласының сасыған көлшіктің маңында жиі ойнайтыны аналар үшін алаңдатушылық тудырып отыр.
Қыстыгүні қатпайтын көлшіктің иісі де баз баяғы қалпында сақталатын көрінеді.
Дәл осындай көлшік қаламыздың Белкөл кентіне шыға берісіндегі көпқабатты тұрғын үйдің маңайында да орналасқан. «КБИ» мөлтек ауданы Жаппасбай батыр көшесінің бойында бір емес екі бірдей көлшіктің «жұпар аңқыған» иісінен қысы-жазы құтыла алмаған тұрғындар да наразылығын білдіруде.

«Сасыған иістің аңқыған иісінен тереземізді жауып отырамыз. Құдды кәріз құдығы іспеттес иісі танысымызды тарылтып келеді. 5 жыл бойы алысқанымыз аңқыған иіс болды. Одан қалды балаларымыз да сол көлшікке барып, тас атып ойнауды әдетке айналдырған. Әкімдік тарапынан қолдау тауып, көмілсе деп сұраймыз»,- дейді Нұргүл Әлжанбаева.

Расында, аз қамтылған, мүмкіндігі шектеулі, көпбалалы және де Ұлы Отан соғысы ардагерлеріне берілген жаңа үйлердің жағдайын білуге бірде – бір құзырлы орындардың келмегеніне наразылық білдірген тұрғындар, қаланың шет аймағы болғандықтан назардан тыс қалған деп тұжырымдауда.

Қалай дегенде де сасық иіске толы сор көлден сорлап отырған жергілікті халық құзырлы орындардан көмек күтеді. Иістен бөлек, оның адам өміріне де үлкен қауіп тудыратындығы да хақ.

Осы мәселе бойынша Қызылорда қаласы әкімдігінің Тұрғын үй-коммуналдық шаруашылығы, жолаушылар көлігі және автомобиль жолдары бөліміне хабарластық. Бұл мәселе бойынша тиісті жұмыстар жүргізіліп жатқанын мәлімдеді.

«2019 жылы Қызылорда қаласының «Сәулет» мөлтек ауданындағы Қойсары батыр және Сарынов көшелері, «Саяхат» мөлтек ауданындағы көлдерді көмуге облыстық бюджеттен 85,7 миллион теңге қаржы бөлінді. Оған «Сәулет» аумағынан 3 көлшік, «Саяхат» мөлтек ауданындағы жалпы аумағы 27 мың шаршы метр болатын көлшіктер көмілген», – дейді бөлім басшысының орынбасары Дархан Бақтияров.

Шарасыздықтан, сасық көлдің зардабын көріп отырған тұрғындар қатары сасық судан шыққан жағымсыз иіспен демалуға мәжбүр. Десе де, атқа мінер азаматтарымыз тиісті шара көріп, тұрғындардың талабын өз дәрежесінде қарастырады деген сенім білдіреміз.