Жалағаш ауданы дзюдодан күміс жүлде иеленді

15 қазан 2024, 11:29

2 219

Жасөпірімдер арасында ұлттық спортымызды насихаттап, жастарды салауатты өмір салтына баулу мақсатында биыл Қызылорда қаласында үшінші рет 2009-2010 жылғы жасөспірімдер арасында «Бала барысы» өтті, - деп хабарлайды "Opennews.kz" ақпарат агенттігі.

Балуандар бәсекесінде топ жарып, күміс жүлде иегері атанған Әлинұр Сәрсенбай – №13 аудандық олимпиадалық резервтің мамандандырылған балалар-жасөспірімдер мектебіндегі дзюдо үйірмесінің мүшесі.

Мұндағы дзюдошылар бүгінде еліміздің үздіктер қатарында. Олардың байрақты бәсекелерде жеткен жетістіктері туралы газетіміздің алдыңғы сандарында бірнеше мәрте қалам тербеген болатынбыз. Бүгінгі кейіпкеріміз Әлинұр Сәрсенбай талай спортшыны шыңдаған қарашаңыраққа 10 жасында келген.

Әкем бала күнінде қазақша күреске қатысқан. Кейін басқа саланы таңдап, спорттан біржола қол үзген. Ал мен спорттық шежіремді 10 жасымда бастап, Өмірбек Кәлменов, Жайдар Есенов сынды бапкерлерден тәлім алып келемін. Шынымды айтсам, дзюдо үйірмесіне ең алдымен достарым қатысты. Олардың спорт саласында жеткен жетістіктерін көріп, менің де қызығушылығым артты. Қазір мен де үзбей дзюдо үйірмесіне қатысып келемін, – дейді жас спортшы.

Бастапқыда жәй ғана достарының шақыртуымен келген Әлинұр уақыт өте аптаның алты күнінде де жаттығу залынан шықпай, спортқа әбден ден қойған. Нәтижесінде байрақты бәсекелерде топ жарған ол – бүгінде қазақша күрес пен дзюдо күресінен спорт шеберіне үміткер.

Өткен аптада облыс аумағынан 32 жасөспірім қатысқан жас палуандар додасында спортшылар қарсыластарын «соқыр» жеребе арқылы анықтады.

Жарыста жеңіске бір табан жақын болдым. Алайда жартылай финалда жеңісті қолдан жіберіп алуыма қарсыласымның салмағының көптігі сеп болды. Одан бөлек ол бұған дейін де қатарынан екі рет жеңімпаз атанған, яғни маған қарағанда тәжірибесі мол. Ал биыл қарсыласым үш дүркін «Бала барысы» атанып, маған күміс жүлде бұйырды. Бұл жеңістің артында бапкерлеріммен күндіз-түні үздіксіз бір жарым ай дайындалған еңбегіміз жатыр. Дәл осы байрақты бәсекеде алдынғы екі жылда жүлдесіз қайтқан болатынмын, – дейді Әлинұр Сәрсенбай.

Жыл басында еліміздің түкпір-түкпірінен жиналған мықты спортшылар Атырау облысы, Құлсары қаласында 2008-2009 жылы туған жасөспірімдер арасында «KULSARY JUDO OPEN CUP – 2024» республикалық турнирінде жүздескен болатын. Аудан абыройын арқалап барған 20 спортшының 8-і жүлдемен оралды. Соның бірі – Әлинұр Сәрсенбай. Ол бұл дода да қарсыластарымен 60 келі салмақта белдесіп, үздік үштікті түйіндеген.

Әлинұр мектебіміздегі болашағынан зор үміт күттіретін спортшыларымыздың бірі. Ол осы уақытқа дейін өзінің мықтылығын бірнеше рет дәлелдеді. Алдағы уақытта да жеңісті жолын жалғап, аудан абыройын асқақтата береді деп сенеміз. Ол қазіргі таңда Мөрәлі Шәменовты еске алуға арналған республикалық турнир мен ҚР чемпионатына іріктеуге дайындық үстінде. Спортшымыз бұл іріктеуден сүрінбей өтіп, чемпионатта топ жару үшін аянып қалмайды деп ойлаймыз, – дейді бапкері Өмірбек Кәлменов.

Қазіргі таңда білім ошағында 9-шы сынып оқитын спортшымыз болашақ мамандығын спорт саласымен байланыстырады. Ол өзінің жаттықтырушылары секілді білек пен біліктілікті бір арнаға тоғыстырып, жасөспірімдерді жеңіске жетелеуден жалықпайтын маман болуды көздейді.