Ішетін асыма допинг салып жібермеуіне кім кепіл?

Қазақ әйелдер арасындағы  бокс чемпионы Назым Қызайбай соңғы кездері ұлттық құрамада болып жатқан жанжалға қатысты пікірін білдірді. Назымның құрамадағы қарсыласы Ангелина Лукас жақында желі арқылы үндеу  жасап, өзінің командадан қуылғанын, мұның артында Қызайбай мен оның жақтастары тұрғанын айтты. Осы оқиғаға байланысты  Назым мен команданың бірнеше мүшесі өз шындықтарымен бөлісті деп хабарлайды «Opennews.kz»  ақпарат агенттігі.  

"Соңғы кезде Ангелина Лукас пен оның жеке бапкері Рахманбек Арғынбаев маған және көптеген командалас қыздарға қатысты желіде жазба жариялап, біздің ар-намысымызға нұқсан келтірді. Осыдан соң, мен де өз ойымды айтамын деп шештім. Бұған дейін мұның бәрі ұжымның ішінде қалсын, тоқтайтын шығар деп ойлағанмын. Алайда, олар тынышталмады. Ангелина Лукас пен бапкері біраздан бері команданың тынышын кетірді. Олар біздер туралы түрлі алып-қашпа әңгімелер таратып, жеке өмірімізге нұқсат келтірді. Ол бірнеше рет сыртымнан жала жауып, мен жайлы ақылға қонымсыз нәрселерді бұқаралық ақпарат құралдарында жариялап келді. Бізді базадан қашып кетті, шетелдегі жарыс кезінде көшеге шығып, коронавирус жұқтырды деп айыптаған да солар. Ал негізінде шетелдегі жарыста ПТР тесті оң нәтиже көрсеткен бас бапкер мен оның көмекшісі еді. Менің Лукас пен бапкеріне қарсы петиция жазғаным рас. 30 боксшының ішінде 22-і мені қолдады. Бұған себеп - Ангелина мен оның бапкерінің біз жататын бөлмеге белгісіз химикатты сеуіп кеткені. Бұл біздің өміріміз үшін қауіпті. Ертең ол менің тамағыма допинг салып жібермесіне кім кепіл?",- дейді Назым.
Сонымен қатар, Назым  құрама мүшесі Балауса Мұздиманова да Ангелина Лукас пен жеке бапкерінің тарапынан қоқын-лоққы көп болатынын баяндады.