Қаз
Рус
«Челси» Дастан Сәтбаевтың «Бернли» сапында ойнауына рұқсат бермеген
Қазақстан құрамасының шабуылшысы Дастан Сәтбаев Англия Чемпионшипіндегі «Бернли» мен «Чарльтон» арасындағы матчқа қатыcпады. Оған футболшының құқығын иеленетін лондондық «Челси» клубы рұқсат бермеген, - деп хабарлайды Opennews.kz ақпарат агенттігі.
«Никки Хайен жаңа ғана «Челсидің» Дастан Сәтбаевқа бүгін кешке ойнауға рұқсат бермегенін айтты. Сондай-ақ Зеки Амдуни тобығындағы жарақатына байланысты 4–6 аптаға қатардан шықты. Бір қиындықтың артынан екіншісі келді», – деп жазды журналист.
Алайда «Челси» қазақстандық футболшыға не себепті ойнауға рұқсат бермегені әзірге белгісіз.
«Бернли» соңғы минутта жеңісті жіберіп алды
«Бернли» мен «Чарльтон Атлетик» арасындағы кездесу 2:2 есебімен аяқталды. Алаң иелері ойынның 96-минутында гол жіберіп алып, жеңісті уысынан шығарып алды.
Дегенмен бір ұпай еншілеген команда Чемпионшиптің турнирлік кестесінде төменгі үштіктен шығып, 21-орынға көтерілді.
