Қармақшыда ұлы ақынның 180 жылдығына орай танымдық конференция мен мәдени шаралар өтті
Бүгін Қармақшы ауданындағы «Руханият» орталығында қазақтың ұлы ойшылы, ақын әрі ағартушысы Абай Құнанбайұлының 180 жылдығына арналған «Адамзаттың Абайы: руханият, парасат, таным» атты аудандық танымдық конференция өтті, - деп хабарлайды "Opennews.kz" ақпарат агенттігі.
Аталған шара – ел руханиятына өлшеусіз үлес қосқан ұлы тұлғаның мол мұрасын насихаттап, жас ұрпақ бойына ұлттық құндылықтарды сіңіруге бағытталған тағылымды кездесу болды.
Абай мұрасы – рухани жаңғырудың өзегі
Шараны Қармақшы ауданы әкімінің орынбасары Самат Қыдырбекұлы ашып жүргізіп, Абай шығармаларының тарихи, тәрбиелік және танымдық маңызын атап өтті. Оның айтуынша, Абайдың мұрасы – елдік сана мен парасаттылықтың биік үлгісі:
– Абай сөзі – ұлттың айнасы. Оның әрбір қара сөзі, әрбір өлеңі – тұтас ұрпаққа арналған мәңгілік бағдаршам, – деді ол.
Конференция барысында түрлі сала мамандары мен қоғам қайраткерлері ой бөлісіп, ұлы ойшылдың еңбектерін бүгінгі күн тұрғысынан талдады.
Білім мен парасат үндестігі – Абай ілімінің негізі
Қазақстан Журналистер Одағының мүшесі, ардагер ұстаз, білім беру ісінің үздігі Дастан Нәзікбаев «Абай – тұлға» атты баяндамасында ұлы ақынның рухани дүниетанымын, оның адамгершілік пен парасат ұғымдарын үндестіре жырлауын кеңінен талдап берді.
Ал Қуаңдария ауылындағы №186 орта мектептің директоры Ғалымжан Кәрібаев «Абай – қазақ тарихындағы ұлы тұлға» тақырыбындағы баяндамасында Абай еңбектерінің қазіргі білім мен тәрбие жүйесіндегі орнына тоқталып, ақын мұрасының заманауи мазмұнмен үндесуін тілге тиек етті.
Қоғам белсенділері – Абай өсиетінің бүгінгі мәні жайлы
Келелі кездесуде Қармақшы аудандық қоғамдық кеңесінің төрағасы Әбдірахман Құлдүйсенов және аудандық ардагерлер кеңесінің төрағасы Асқар Мереков сөз сөйлеп, Абай шығармаларындағы еңбекқорлық, білімге құштарлық, адамдық қасиеттер жайлы ойларын бөлісті. Олар ұлы ойшылдың бұл бағыттағы идеяларын жастар тәрбиесіне жүйелі түрде енгізу қажеттігін атап өтті.
Абайға тағзым – өнер мен өсиет арқылы
Конференция соңында Абайдың қара сөздерінен үзінділер оқылып, ақынның әндері шырқалды. Мектеп оқушылары мен жас өнерпаздар арнау-жырлар, әдеби көріністер арқылы Абай рухын ұлықтап, көрерменге терең әсер қалдырды.
Шараны қорытындылаған Самат Қыдырбекұлы:
– Абай мұрасын насихаттау – ел болашағы үшін аса маңызды. Оның сөзін тек оқып қоймай, әр салада іске асыру – басты міндет, – дей келе, осындай кездесулердің тұрақты түрде өткізілуін қолдайтынын жеткізді.
«Абай әлемі» – өнер арқылы ой ояту
Атаулы күн аясында Қармақшы аудандық мәдениет үйінде «Абай әлемі» атты облыстық өнер байқауы ұйымдастырылды. Байқауға облыс көлеміндегі өнерлі жастар қатысып, ұлы ақынның әдеби мұрасын кеңінен дәріптеді. Бұл шара жас ұрпақтың рухани-мәдени деңгейін арттырып, Абайдың өнегелі ілімін тереңірек тануға мүмкіндік берді.
Қармақшы ауданында өткен бұл рухани-танымдық іс-шаралар Абай Құнанбайұлының 180 жылдық мерейтойын тек мерекелік деңгейде емес, тәрбие мен танымның құралы ретінде атап өтуге бағытталды. Абай мұрасын ұлықтау – ұлт болашағы үшін жасалып жатқан маңызды рухани инвестиция.
