Әжелер 110 метрлік сырмақ тігуде
2 516
Алматы қаласының Бостандық ауданында ұзындығы 110 метр болатын бірегей сырмақ әзірленіп жатыр,- деп хабарлайды Оpennews.kz ақпарат агенттігі.
Жобаны аудан әкімдігінің қолдауымен «Қазақ аналары» әжелер қауымдастығы жүзеге асыруда.
Бұйым дәстүрлі басу және тігу тәсілдері арқылы қолмен жасалуда. Сырмақ классикалық қазақы ою-өрнекпен көмкеріліп, әрбір өрнек пен әр бөлшегінде ұрпақ сабақтастығы, ұлттық қолөнерге деген құрмет пен мәдени мұраны сақтау ниеті бейнеленген.
Ұйымдастырушылардың мәліметінше, жұмысты 21- ші наурызға дейін аяқтау жоспарланып отыр. Наурыз мерекесінде үлкен сырмақ көпшілік назарына ұсынылады.
Жоба авторлары дайын бұйымды Гиннестің рекордтар кітабына енгізуді көздеп отыр.
