Өнер мен дәстүрге жаңа серпін берген фестиваль

2026 жылдың 23,24 - ші сәуірінде Тараз қаласындағы «Көне Тараз» тарихи-этномәдени кешенінде «Тараз - қолөнершілер қаласы» Халықаралық қолөнершілер фестивалі ұйымдастырылады,- деп хабарлайды Opennews.kz ақпарат агенттігі kaz.inform.kz сайтына сілтеме жасап.

Фестивальге шетелден - Қырғызстан, Өзбекстан, Тәжікстан елдерінен, сондай-ақ көрші өңірлерден - Алматы және Түркістан облыстарынан қонақтар мен қатысушылар келеді. Сонымен қатар, еліміздің әр аймағынан және жергілікті жерден 100-ден астам қолөнер шебері қатысады. Фестиваль аясында көрермендерге ерекше әсер мен шабыт сыйлау мақсатында бірқатар мазмұнды іс-шаралар ұйымдастырылады. Атап айтқанда, «Тараз-  қолөнершілер қаласы. Дәстүр мен заманауи қолөнер» атты ғылыми-практикалық конференция өткізіліп, онда ұлттық қолөнердің дамуы мен қазіргі үрдістері талқыланады. Сондай-ақ қолөнер бұйымдарының көрмесі мен шеберлік сағаттары, жас өнерпаздар мен суретшілерге арналған «Менің әлемім: қиял мен шынайылық» көрмесі ұсынылады.

Бұдан бөлек, сән мен дәстүрді ұштастырған «ASPARA FASHION WEEK» халықаралық сән апталығы ұйымдастырылады. Бағдарлама аясында «Гиннестің рекордтар кітабына» енген киіздің жанында өтетін «Dombyra Party» музыкалық кеші, ұлттық нақыштағы киімдердің сән көрсетілімі және өнер жұлдыздарының қатысуымен гала-концерт жоспарланған. Фестиваль қонақтары көрмеге қойылған бұйымдарды сатып алу мүмкіндігіне ие болып, сондай-ақ қаладағы тарихи-мәдени орындарға экскурсия жасай алады. Осы күндері Тараз ұлттық дәстүр мен заманауи өнер үйлескен, рухани серпін мен шығармашылық шабыт тоғысқан орталыққа айналмақ.