Қаз
Рус
Қазақстанда зәйтүн майы бір жылда 21% қымбаттаған
Energyprom.kz ресурсы елімізде тазартылған өсімдік майының өндіріс көлемі 8,1% азайып, тазартылмай өндірілетін өсімдік майының көлемі 36,3% артқандығын жазды, - деп хабарлайды "Opennews.kz" ақпарат агенттігі.
Қаңтар-наурыз аралығында қазақстандық өндірушілер 171,4 мың тонна өсімдік майын нарыққа шығарған. Бұл былтырғыдан 23,7% артық.
Соның ішінде тазартылып өндірілетін өсімдік майының көлемі бір жылда 8,1% азайып, 36,1 мың тонна болса, тазартылмай өндірілетін май көлемі 36,3% артып, 135,3 мың тоннаға жеткен.
«Өңірлер арасында Шығыс Қазақстан облысының көрсеткіші жоғары: 17,3 мың тонна тазартылған өсімдік майы, 46,1 мың тонна тазартымаған өсімдік майы өндірілген. Тазартылмаған өсімдік майының өндіріс көлемі бойынша Абай және Алматы облыстары алғашқы үштікті түйіндеп тұр», - деп жазылған сараптамада.
Сондай-ақ, бір жылдың ішінде май экспортының көлемі 43,4% ұлғайып, 53,5 мың тоннаға жеткен. Яғни, өндірілген майдың 38,2% сыртқа сатылған.
Ішкі нарықта өсімдік майының сатылымы 86,7 мың тонна болып, бір жыл бұрынғы көрсеткіштен 26,7% артық болған.
Отандық компаниялар күнбағыс майына деген ішкі сұранысты 83,7% жапқан.
Ал экспортқа 41,7 мың тонна шығарған. Бұл бір жыл бұрынғы көрсеткіштен 1,9 есе көп.
Күнбағыс майы әсіресе Қарағанды облысында, зәйтүн майы Павлодар облысында қатты қымбаттаған.
