Қазақстанда қандай мамандарға айына 1 миллион теңгеге жуық жалақы берілетіні белгілі болды

10 қаңтар 2024, 11:49

2 561

Желтоқсан айында жұмыс берушілер тарапынан білікті кадрларға деген сұраныс аз болған, - деп хабарлайды "Opennews.kz" ақпарат агенттігі.

2023 жылы желтоқсанда Электрондық еңбек биржасында (бұдан әрі – ЭЕБ) 119,6 мың бос жұмыс орны мен 59,2 мың түйіндеме жарияланған. Қарашамен салыстырғанда сұраныс 10 %-ға (+10,6 мың бос орын) өсіп, ұсыныс 23%-ға (-17,8 мың түйіндеме) қысқарған.

Желтоқсан айында негізгі сұраныс басқа қызмет түрлерінің кәсіпорындары (16,8 мың бос жұмыс орны), ауыл шаруашылығы (13,9 мың бос жұмыс орны) мен негізгі және орта білім беру ұйымдары (6,8 мың бос жұмыс орны) есебінен қалыптасты. Олар жиынтығында барлық орналастырылған бос жұмыс орындарының үштен бірінен астамын құрайды.

Солтүстік Қазақстан, Шығыс Қазақстан, Қарағанды облыстары мен Алматы қаласында білікті мамандарға сұраныс азайған.

"Жалпы сұраныстың ұсыныстан басым болуына қарамастан, желтоқсан айында заңгерлердің (214 бос орын және 846 түйіндеме), дене шынықтыру және спорт мұғалімдерінің (112 бос орын және 425 түйіндеме) және бастауыш сынып мұғалімдерінің (151 бос орын және 442 түйіндеме) айтарлықтай артықшылығы байқалды. Жарияланған түйіндемелердің жартысы 16 мен 35 жас аралығындағы жастарға тиесілі", - делінген хабарламада.

Жұмыс берушілер қараша айында ең жоғары жалақыны өндірістің бас технологтарына (орта есеппен 954 мың теңгеден), ұңғымаларға қызмет көрсететін инженерлерге (800 мың теңгеден) және жүйелік сәулетшілерге (700 мың теңгеден) ұсынды.

"Өз кезегінде ең жоғары жалақыны ұңғымаларға қызмет көрсететін инженерлер (орта есеппен 1,5 млн теңгеден), бұрғылау бойынша жетекшілер (1,1 млн теңгеден) және өнімді әзірлеу бойынша менеджерлер (935 мың теңгеден) алды. Осылайша, желтоқсанда жылдың аяқталуына және жұмыс берушілер тарапынан кадрлық белсенділіктің төмендеуіне байланысты жұмыс берушілердің білікті кадрларға деген қызығушылығы төмен екені байқалды", - делінген хабарламада.