Ұлттық қордан баланың шотына ақша түскенін қалай тексеруге болады?

Ұлттық қордан балаларға берілетін қаражат 2024 жылдың 1 ақпанынан бастап төлене бастайды, - деп хабарлайды "Opennews.kz" ақпарат агенттігі.

Бірыңғай жинақтаушы зейнетақы қоры Tengrinews.kz редакциясының ресми сауалына берген жауабында бүгінде ата-ана баласы туралы деректердің дұрыстығын және олардың eGov.kz порталының жеке кабинетіне енгізілген-енбегенін тексеру қажет екенін хабарлады.

"Ұлттық қор - балаларға" бағдарламасы сайтында баланың жеке сәйкестендіру нөмірін (ЖСН) енгізу қажет болатын арнайы бөлім құрылады. Осының арқасында бала бағдарламаға қатысушы болды ма, көре аласыз.

Бұл ақпарат қордың веб-сайтында ақпанда балалардың шотына төлем түсе бастағанда пайда болады. Бұл қызметтер төлем жасалғаннан кейін жұмыс істей бастайды.

Ата-аналар немесе заңды өкілдер eGov.kz сайтындағы жеке кабинетінде әрбір бала туралы толық ақпаратты көре алады.

Жеке кабинетке кіргеннен кейін баланың ата-анасы "Цифрлық құжаттар" бөліміне өтуі керек.

Бұл бөлімде: "Менің құжаттарым", "Отбасы" және "Басқа құжаттар" бөлімдері бар. Аударым деректерін тексеру үшін төлемдер туралы толық деректер болатын "Отбасы" бөліміне өту керек.