Қазақстандықтар экономикадан әлемдік олимпиадада жүлделер иеленді

Қазақстан құрамасы экономикадан халықаралық олимпиаданы жүз пайыздық нәтижемен аяқтады,- деп хабарлайды Opennews.kz ақпараттық агенттігі.

Оқушылар бір алтын, үш күміс және бір қола медаль жеңіп алды. Қытайдың Сучжоу қаласындағы білім додасына әлемнің 61 елінен 300-ге жуық дарынды оқушы қатысқан. 

Бас жүлдені Астана қаласы Нұра ауданындағы NIS-тің 11-сынып оқушысы Мұхтархан Батырхан иеленді.
Бұл – оның экономикадан халықаралық олимпиададағы екінші алтыны. Осылайша қазақстандық оқушы IEO додасының екі дүркін алтын жүлдегері атанған. Күміс медальдардың үшеуін де алматылық оқушылар жеңіп алған.
Кемелов Динмухаммед пен Жапаров Альтаир – Алматы қаласы Медеу ауданындағы NIS-тің 11-сынып оқушылары. Тағы бір күмісті «Мирас» халықаралық мектебінің оқушысы Сұлтанбек Аружан иеленген. Қола медаль Алматы қаласы Медеу ауданындағы NIS-тің 10-сынып оқушысы Қуанышбек Темірланға бұйырған. Бес жүлденің төртеуін Алматы оқушылары, ал алтын медальды Астана өкілі жеңіп алған. Ұлттық құраманың қорытынды нәтижесі:

Мұхтархан Батырхан – алтын медаль;

Кемелов Динмухаммед – күміс медаль;

Жапаров Альтаир – күміс медаль;

Сұлтанбек Аружан – күміс медаль;

Қуанышбек Темірлан – қола медаль.

Командадағы әр оқушының медаль алуы жекелеген дарындардың ғана емес, бүкіл құраманың жоғары деңгейде дайындалғанын көрсеткен. 

International Economics Olympiad – экономика, қаржы және бизнеске қызығатын мектеп оқушыларына арналған беделді халықаралық жарыстардың бірі. Қатысушылар тест және ашық сұрақтарға жауап беріп, экономикалық үдерістерді талдайды әрі практикалық міндеттерді шешкен. Командалық кезеңде бизнес-кейс әзірлеп, оны қазылар алқасының алдында ағылшын тілінде қорғаған. Оқулықтағы анықтамаларды жаттау жеткіліксіз. Оқушыларға аналитикалық ойлау, қаржылық сауаттылық, деректермен жұмыс істеу және қысқа уақытта тиімді шешім қабылдау қабілеті қажет.            Бұл дағдылар болашақ экономистер, кәсіпкерлер, қаржы сарапшылары мен басқарушылар үшін шешуші рөл атқарады. Қазақстан құрамасын «Teenvestor» мектебінің директоры әрі ұлттық құрама жаттықтырушысы Руслан Мулдашев пен «Дарын» республикалық ғылыми-практикалық орталығының әдіскері Зере Жарлагапова дайындаған.

Олимпиада 2026 жылғы 12–20 - шілде аралығында өткен. Қазақстандық оқушылар әлемнің 61 еліндегі ұлттық іріктеулерден өткен үздік жас экономистермен сынға түсті. Бес оқушының бес медаль жеңіп алуы Қазақстанның тек дәстүрлі жаратылыстану және нақты ғылымдарда ғана емес, экономика, қаржы және бизнес бағыттарында да бәсекеге қабілетті екенін көрсеткен.