Фермерлерге әр гектарға 250 доллар табыс ұсынылмақ

16 маусым 2025, 10:30

2 721

Қазақстандық фермерлер болашақта топырақты ұқыпты және тиімді пайдаланғаны үшін әр гектардан 250 АҚШ долларына дейін пассив табыс таба алады,- деп хабарлайды "Opennews.kz" ақпарат агенттігі.

Фермер табыс алу үшін жүйеде бірнеше кезең болады. Бірінші қадам — заңнамаға өзгерістер енгізу.

"Біз онда терминологияны бекітіп, осы механизмнің жұмыс істеуі үшін құқықтық база қалыптастырамыз. Фермер үшін болашақта пассив табыс алудың басты шарты — жерге арналған мемлекеттік актінің болуы. Бұл бірінші шарт", - деді ҚР АШМ өкілі.

Келесі кезеңде жер пайдаланушының цифрлық кабинеті іске қосылады. Бұл — комитеттің ақпараттық жүйесіндегі арнайы бөлім. Ол фермерлерге өз жер телімдерінің жағдайын толық көріп отыруға мүмкіндік беретін тегін құрал болмақ.

"Онда фермердің жер учаскесі туралы барлық ақпарат көрсетіледі. Яғни бастапқы нүктеде топырақтың сапалық жағдайы – қозғалмалы калий, фосфор мөлшері, геоботаникасы туралы мәліметтер енгізіледі. Олардың біржылдық не көпжылдық шөптерді еккені, агрохимиялық құрамы — осының бәрі жүйеде сақталады. Динамикада жайылым айналымы бар ма, оны фермер сақтап отыр ма, соны бақылап отырамыз", - деп түсіндірді М. Теміржанов.