Бензин мен тариф бағасына мораторий енгізіліп, ипотека көлемі ұлғаяды — Үкімет
Премьер-министр Үкімет мүшелерінің, басқа да мемлекеттік органдар мен ұйымдар басшыларының қатысуымен Мемлекет басшысының азаматтар мүддесі үшін экономикалық реформалар бағдарламасын жүзеге асыруды ретке келтіру жөніндегі тапсырмаларын орындау мәселелері бойынша кеңес өткізді, - деп хабарлайды "Opennews.kz" ақпарат агенттігі.
Бензин мен дизельге мораторий
2025 жылғы 16 қазаннан бастап АИ-92 маркалы бензин мен дизель бағасын көтеруге шектеу қойылды. Энергетика министрлігіне нарықты отынмен тұрақты қамтамасыз ету тапсырылды.
🔹 Коммуналдық тарифтер тоқтатылады
2026 жылдың I тоқсанына дейін барлық тұтынушылар үшін коммуналдық тарифтерді көтеруге тыйым салынды. Әлеуметтік осал топтарға тұрғын үй көмегі жалғасады.
🔹 Азық-түлік бағасын тежеу
Әлеуметтік маңызы бар азық-түлік бағасын тұрақтандыру үшін ауыл шаруашылығын қаржыландыру екі есе артады. Делдалдық схемаларға бақылау күшейтіледі.
🔹 Салық реформасы
2026 жылғы 1 қаңтардан бастап шағын және микро бизнес үшін:
салықтық және камералдық тексерулер тоқтатылады,
артық шектеулер алынып тасталады,
2026 жылдың 1 сәуіріне дейін негізгі қарыз өтелсе, өсімпұлдар мен айыппұлдар жойылады.
🔹 Ипотека көлемі ұлғаяды
«Наурыз» және «Наурыз-Жұмыскер» бағдарламалары арқылы ипотека көлемі 500 млрд теңгеге дейін арттырылады. «Әскери баспана» бағдарламасы қайта іске қосылады. Құрылысшылар үш жылға бағаны ұстап тұруға міндеттеледі.
🔹 Автокөлік пен лизинг
Халыққа жеңіл автокөлік сатып алу үшін лизинг тетігі енгізіледі. Бағдарлама отандық автоөндірушілермен және банктермен жүзеге асырылады.
🔹 Бизнесті қолдау
«Бәйтерек» холдингіне ШОБ-ты қолдаудың қосымша шараларын дайындау тапсырылды.
