Жұмыспен қамтылғандар саны артқанымен, жұмыссыздық та көбейді

Жұмыссыздық деңгейі қанша пайызға өскені анықталды. Ұлттық статистика бюросы еліміздің еңбек нарығындағы жағдай туралы мәліметтерді жариялады, - деп хабарлайды "Opennews.kz" ақпарат агенттігі.

Ұлттық статистика бюросының мәліметінше, 2025 жылғы III тоқсанда Қазақстанда жұмыссыздық деңгейі 4,6 пайыз болған. 15-34 жастағы жастар арасындағы жұмыссыздық деңгейі – 3 пайыз.

Биыл III тоқсанда экономиканың әртүрлі салаларында 9 330,1 мың адам жұмыспен қамтылған, олардың 7155,4 мыңы (жұмыспен қамтылғандардың жалпы санынан 76,7 пайыз) жалдамалы қызметкер болса, 2 174,7 мың адам (жұмыспен қамтылғандардың жалпы санынан 23,3 пайыз) өзін-өзі жұмыспен қамтығандар.

15 және одан жоғары жастағы халыққа шаққандағы жұмыспен қамту деңгейі – 64,8 пайыз.

Өткен жылдың сәйкес тоқсанымен салыстырғанда жалпы жұмыспен қамтылғандар 96,3 мың адамға өскен (негізінен жалдамалы қызметкерлердің есебінен).

Жұмыспен қамтылғандардың ең көп үлесі сауда (17,0 пайыз), білім беру (13,1 пайыз), өнеркәсіп (12,3 пайыз) және ауыл шаруашылығы (10,8 пайыз) салаларында байқалған.