Қызылорда облысында жол желісі бойынша 21 жоба пайдалануға беріледі

Қызылорда облысында жергілікті жол желісі бойынша  21 жоба жыл соңына дейін пайдалануға беріледі, деп хабарлайды Opennews.kz ақпарат агенттігі ҚР Индустрия және инфрақұрылымдық даму министрлігінің Telegram каналына сілтеме жасап.

Қызылорда облысында 45 жоба қолға алынған. Облыстық және аудандық маңызы бар жолдардың ұзындығы 2381 шақырым. Бүгінде нормативтік жағдайдағы автожолдардың үлесі – 70%.

Қазіргі таңда, облыста жөндеу жұмыстарымен 248 шақырым жол қамтылған. Атап айтқанда, Қызылорда қаласындағы басты көше жолының «Батыс Еуропа-Батыс Қытай» тас жолымен, сондай-ақ аудандық маңызы бар «Самара-Шымкент-Қамыстыбас-Аманөткел-Жаңақұрылыс» автожолымен түйіскен жерінде көлік айырығының құрылысы жүргізілуде. Бұдан бөлек, аудандық маңызы бар «Әйтеке би – Қазалы» жолын, «Самара-Шымкент-Екпінді», «Әйтеке би-Басықара» және «Самара-Шымкент-Еңбек-Есет батыр-Жаңадария» жолдарындағы көпірлерді, сондай-ақ, Есет батыр елдімекеніне кіреберісті реконструкциялау жүргізілуде.