Қайрат Келімбетов елімізде АЭС салуға қатысты пікір білдірді

ҚР Стратегиялық жоспарлау және реформалар агенттігінің төрағасы Қайрат Келімбетов елімізде атом электр стансасын салуға қатысты пікір білдірді- деп хабарлайды Opennews.kz ақпарат агенттігі ҚазАқпарат сайтына сілтеме жасап.

«Атом электр стансасы геосаясаттың құралы екендігін білеміз. Ал технологиялар – бұл біздің қауіпсіздігіміз, жайлылығымыз. Бірақ саясат емес. Дегенмен, Қазақстан атом энергетикасын енгізу мүмкіндігін зерделеп жатыр. Президент Қасым-Жомарт Тоқаев Үкіметке тұрақты даму үшін атом энергетикасы қаншалықты тиімді екендігін тыңғылықты әрі байыппен зерделеуді өтінгендігін білемін. Алайда, сөз болашақ технологиясы, көміртегі бейтараптылығы жайында болған кезде меніңше, орта мерзімді келешекте мүлдем жаңа технологияларды көріп қалуға тиіспіз», - деді ол Астана клубының 6-отырысында.

Оның атап өтуінше, мұндай жаңа технологиялар дамушы елдердің де сатып алуына қолжетімді болуы қажет.

«Бұл ретте проблеманы шешудің революциялық емес эволюциялық әдістері қажет. Меніңше, Қазақстан күнтәртібі Қытай мен Үндістанның күнтәртібіне жақындап қалды. Технологияларды дамыту үшін қолда бар мүмкіндіктерді пайдалану қажет. Мәселен, бізде көміртегі тұтқышына қатысты өте үлкен қызығушылық бар», - деді Қайрат Келімбетов.