2023 жылы Батыстағы электр желілерін күшейту жобасы аяқталады - министр

Үкімет отырысында энергетика министрі Болат Ақшолақов 2023 жылы Батыстағы электр желілерін күшейту жобасы аяқталатынын айтты, - деп хабарлайды Opennews.kz ақпарат агенттігі.

«Ұлттық электр желілерін жаңғырту жұмысы жүргізілуде. Оның ішінде Батыс энергия аймағы электр желілерін күшейту бойынша құрылыс-монтаждау жұмыстарын 2023 жылы аяқтау көзделіп отыр», - деді ведомство басшысы.

Ал Оңтүстік энергия аймағының электр жүйелерін күшейту бойынша техникалық-экономикалық негіздеме әзірленіп жатқан көрінеді.

«Негіздеме дайын болғаннан кейін жобаны іске асырудың параметрлері мен мерзімдері айқындалады», - деді Болат Ақшолақов.

Айта кету керек, Үкіметтің кешегі кеңейтілген отырысында Мемлекет басшысы Оңтүстік және Батыс аймақтардың электр желісін күшейту жұмыстары жеткіліксіз қарқынмен жүргізіліп жатқанын сынаған еді.