Талапкерлерден жоғарғы оқу орындарында құжат қабылдау жүріп жатыр

2023-2024 оқу жылына жоғары оқу орындарына түсу үшін құжаттарды қабылдау 20 маусым мен 25 тамыз аралығында, ал 13-20 шілдеде білім беру гранттарының конкурсына өтініш қабылдау өтеді, - деп хабарлайды "Opennews.kz" ақпарат агенттігі Ғылым және жоғары білім министрлігінің баспасөз қызметіне сілтеме жасап.

Отандық ЖОО-ларға оқуға түсу үшін талапкерлер жеке куәлік, ҰБТ сертификатын, 3х4 көлеміндегі фото, орта білім туралы аттестат (техникалық және кәсіптік білім беру (ТжКБ) ұйымдарының түлектері үшін диплом), №075/у нысанындағы медициналық анықтама, ер жігіттер үшін әскери тіркелу куәлігін тапсыру керек. Сондай-ақ, жеңілдетілген санат бойынша конкурсқа қатысу үшін растайтын құжаттар ұсынылады.

Оқуға түсушілер 18 мамырда басталып, 5 шілдеге дейін өтетін ҰБТ-ның екі нәтижесінің біреуін грант конкурсына ұсына алады. Білім беру гранты иегерлерінің тізімі 10 тамызға дейін жарияланады.

Айта кетсек, «Педагогикалық ғылымдар» және «Денсаулық сақтау» білім беру салалары бойынша қабылдау арнаулы емтихан нәтижелері есепке алына отырып жүргізіледі. Бұл емтихан ЖОО базасында 20 маусым мен 20 тамыз аралығында өткізіледі.

Шығармашылық емтихандарға қатысу үшін өтініштерді ЖОО-лар 20 маусымнан 7 шілдеге дейін қабылдайды, емтихандардың өзі 8-15 шілде аралығында өтеді.