1500-ден астам оқушы «Атамекен» әнін орындады

Республика күніне орай елордада 1500-ден аса оқушы флешмобқа қатысты,- деп хабарлайды "Opennews" ақпараттық агенттігі. 

Елордада Ұлттық мереке — Республика күніне арналған ерекше рухты іс-шара өтті. Мемлекеттік рәміздер алаңында ұйымдастырылған ауқымды флешмобта 1500-ден аса мектеп оқушысы қазақ халқының жүрегінен орын алған «Атамекен» әнін бірігіп орындады.

Бұл бастама «Адал азамат» бірыңғай тәрбие бағдарламасы аясында жүзеге асып, жас ұрпақтың бойында отансүйгіштік сезімді, азаматтық жауапкершілікті және елдік сана мен бірегейлікті қалыптастыруды мақсат етті.

Флешмоб барысында оқушылар бес қатарға бөлініп, алақан бейнесінде сап түзеді. Бұл — бейбітшілік пен мейірімділіктің, ашықтық пен қолдаудың символына айналды. Жас буынның бірлігі мен достығын бейнелейтін бұл көрініс жүрекке жылы әсер қалдырды.

Сонымен қатар, Астананың барлық білім ордаларында осындай флешмобтар өтті. Оқушылар «Менің Қазақстаным» атты патриоттық акцияға қолдау білдіріп, елге деген сүйіспеншіліктерін ән арқылы жеткізді.