Жұқпалы аурулардың таралуына байланысты 169 сынып онлайн оқытуға көшті

Шығыс Қазақстан облысында жұқпалы аурулардың көбеюіне байланысты бірқатар мектептер қашықтан оқыту форматына ауыстырылды,- деп хабарлайды Opennews.kz ақпарат агенттігі.

Ресми мәліметке сәйкес, өңірдегі 23 мектептің 169 сыныбындағы 3015 оқушы уақытша онлайн оқып жатыр. Оның ішінде 1697 оқушы – бастауыш сыныптағылар.

Қашықтан оқуға Өскемен қаласының 18 мектебі, Күршім ауданының 3 мектебі және Ұлан ауданындағы 2 мектеп көшірілген.

Басқарма онлайн форматқа көшу тәртібін түсіндірді:
— Егер сынып оқушыларының 30%-дан астамы медициналық анықтамамен расталған себепке байланысты сабаққа қатыспаса, сынып уақытша онлайн оқуға ауыстырылады.

Ведомство өкілдері білім беру процесі толық көлемде жалғасып жатқанын, сабақты қашықтан оқыту талаптары бойынша өткізу қамтамасыз етілгенін атап өтті.

Еске сала кетсек, бұған дейін өңірлік білім басқармасы сыныптарды онлайн форматқа көшіру ережесін түсіндірген болатын.