2–6 жас аралығындағы балалардың балабақшаға кезек күтуі екі есе қысқарды
2025 жылы 2–6 жас аралығындағы балаларды мектепке дейінгі тәрбие және оқытумен қамту деңгейі 95,9 пайызға жетті. Бұл туралы Орталық коммуникациялар қызметінде өткен брифингте Оқу-ағарту министрлігінің өкілдері мәлімдеді,-деп хабарлайды Opennews.kz ақпарат агенттігі.
Ведомствоның дерегінше, 2019 жылдан бері мектепке дейінгі ұйымдар саны 8,6 пайызға артып, 10 650-ден 12 мыңға дейін көбейген. Қазіргі таңда бұл мекемелерде 1 миллионнан астам бала тәрбиеленуде.
Оқу-ағарту бірінші вице-министрі Майра Мелдебекованың айтуынша, Президент тапсырмасы негізінде 2023–2027 жылдарға арналған қадамдық жоспар жүзеге асырылып жатыр. Жоспар бойынша 2027 жылға дейін 300 мың жаңа орын ашылуы тиіс.
Министрлік мектепке дейінгі білім беру ұйымдарын тұрақты қолдау жалғасып жатқанын атап өтті.
