Құрылыс алаңында заңсыз жұмыс істеген 44 шетелдік анықталды

Ақмола облысында «Заңсыз келуші-2026» рейді кезінде заңсыз жұмыс істеген 44 шетелдік анықталды, - деп хабарлайды  Opennews.kz ақпарат агенттігі.

Целиноград ауданының Софиевка ауылында жүргізілген рейд барысында көші-қон заңнамасын бұзған шетел азаматтары анықталды. Жалпы үш күнде полицейлер 101 заң бұзушылықты тіркеді. 

Іс-шара барысында 56 шетелдік, оларға баспана берген 34 адам және 11 жұмыс беруші әкімшілік жауапкершілікке тартылды. Сот шешімімен 18 шетел азаматы Қазақстаннан шығарылды. Тағы алты адамның елде болу мерзімі қысқартылды. 

Сонымен қатар полиция соттың елден шығару туралы шешімін орындамаған шетелдік азаматты анықтады. Қазір оған қатысты тиісті шаралар қабылданып жатыр. 

Полицейлер рейд жұмыстарын жалғастыруда. Олар шетел азаматтарын, жұмыс берушілерді және шетелдіктерге баспана беретін азаматтарды көші-қон заңнамасының талаптарын сақтауға шақырды.