Телефонды мектепке әкелуге болады, бірақ қолдануға болмайды

Қазақстандық оқушыларға мектепке смартфон алып келуге рұқсат етілген, бірақ оны оқу процесі кезінде пайдалануға болмайды. Оқу-ағарту министрлігі қолданыстағы шектеулерді түсіндіріп, еліміздегі барлық мектепке арналған бірыңғай ережелердің дайындалып жатыр, - деп хабарлайды Opennews.kz ақпарат агенттігі.

Ведомство Қазақстанда оқу процесі кезінде ұялы телефондарды пайдалануға қойылған шектеу 2024 жылдан бастап күшінде екенін еске салды. Бұл ретте оқушы смартфонды үйде қалдыруға міндетті емес.

Осылайша, сабақ кезінде оқушы телефонды өзінде қалдыра алады - мысалы, сөмкесіне немесе арнайы ұяшыққа салуына болады. Құрылғыны пайдалануға болмайды.

Ерекшеліктер екі жағдайда қарастырылған: егер смартфон білім беру мақсатында қажет болса және бұл оқу жоспарында көзделсе, сондай-ақ төтенше жағдайлар кезінде.

Министрлік мәліметінше, шектеулер сабақ кезінде алаңдатушы факторларды азайтуға, оқушылардың зейінін арттыруға, гаджеттерге тәуелділікті және онлайн-буллинг қаупін қысқартуға тиіс. Сонымен қатар, бұл шаралар балалардың көру қабілеті мен психологиялық саулығын қорғауға, сондай-ақ тікелей араласуға жағдай жасауға бағытталған.

Осы уақытқа дейін смартфондарды пайдаланудың ішкі тәртібін әр мектеп өз бетінше айқындап келді. Соның салдарынан әртүрлі оқу орындарындағы талаптар бір-бірінен өзгешеленуі мүмкін еді.

Енді министрлік мәліметінше, бұл тәсіл өзгереді. 2024 жылғы 28 мамырдағы заңмен мектептерде ұялы телефондарды пайдалану ережелерін бекіту құзыреті Оқу-ағарту министрлігіне берілді. Ведомство қазіргі уақытта мектептерде қолданылатын бірыңғай ережелер жобасы әзірленіп жатқанын хабарлады.

Бұған дейін бұл мәселе Парламентте бірнеше рет талқыланған болатын. Депутаттар бірыңғай талаптардың жоқтығы әртүрлі тәжірибеге алып келетінін айтқан еді: кейбір мектептер қатаң шектеулер енгізсе, басқалары ата-аналармен туындауы мүмкін дау-дамайлардан қорқып, мұндай қадамға бармаған.