Жоғары және жоғары оқу орнынан кейінгі білім берудің мемлекеттік жалпыға міндетті стандарттарын бекіту

Білім берудің мемлекеттік жалпыға міндетті стандартына енгізілген өзгерістер университеттер мен ғылыми ұйымдарда академиялық еркіндіктің жаңа деңгейін қамтамасыз етеді, - деп хабарлайды "Opennews.kz" ақпарат агенттігі.

Енді жоғары оқу орындары түлектерге еңбек нарығында қандай білім мен дағдылар сұранысқа ие болуға көмектесетінін ескере отырып, жалпы білім беретін пәндер (ЖБП) циклінің барлық пәндерінің мазмұнын толық немесе ішінара өзгерте алады. Студенттерге дипломдық жұмысты жазудың орнына қорытынды аттестаттау ретінде іске асырылатын жобаны немесе өз өнертабысын ұсынуға рұқсат етіледі.

 Қажетті өзгерістер "Жоғары және жоғары оқу орнынан кейінгі білім берудің мемлекеттік жалпыға міндетті стандарттарын бекіту туралы" бұйрыққа енгізіліп, қолданысқа енді.

 

"Мемлекеттік жалпыға міндетті білім беру стандартына қойылатын талаптарды жеңілдету жоғары оқу орындарына кадрларды кәсіби даярлау деңгейін арттыруға және еңбек нарығындағы өзгерістер мен жұмыс берушілердің тілектеріне жедел ден қоюға мүмкіндік береді", - деп атап өтті Саясат Нұрбек.

 Сондай-ақ жоғары оқу орындарына жеке оқу жоспарларының құрылымын дербес бекіту құқығы берілді. Магистранттар мен докторанттар оқу траекториясын өздері таңдайтын болады.

 Сонымен қатар, үздіксіз білім беру тұжырымдамасын іске асыру мақсатында бұйрықта микробіліктілік бойынша оқыту нәтижелерін тану қарастырылып, «нано-дәрежелер», «ұлғайтылған дәрежелер (Stackable degree)» ұғымдары енгізілген. Бұл студенттердің кәсіби дағдыларын тез меңгеріп, дамытуға мүмкіндік береді.

 Сонымен қатар ЖМБС (Жалпыға міндетті білім беру стандарты) практик-мамандарды студенттердің дипломдық жұмыстары мен жобаларына, сондай-ақ магистранттардың бейіндік бағыттары бойынша ғылыми жұмыстарына жетекшілік етуге мүмкіндік береді. Шетелдік тағылымдамадан өту үшін ұйымдарға қойылатын талаптар қайта қаралды. Енді магистранттар мен докторанттар жетекші ғылыми орталықтар мен институттарда ғылыми тағылымдамадан өтетін болады.

 Бұдан басқа базалық және бейіндік пәндер блоктарының кредиттерінің санын қатаң регламенттеу алынып тасталды. Егер бұрын базалық пәндер циклі кемінде 112 кредитті, бейінді пәндер циклі – 60 кредитті құраса, енді сол немесе өзге мамандық бойынша кәсіптік даярлық ерекшеліктерін ескере отырып, ЖОО-лардың өздері осы пропорцияларды белгілейтін болады.