«Үздік педагог-2022» конкурсына қатысуға 2,6 мыңнан астам өтінім түсті
Бірінші аптаның қорытындысы бойынша «Үздік педагог-2022» конкурсына қатысуға 2,6 мыңнан астам мұғалім мен тәрбиеші өтінім берді, деп хабарлайды Opennews.kz ақпарат агенттігі.
Оқу-ағарту министрлігінің мәліметінше, «Үздік педагог-2022» конкурсына қатысуға құжат қабылдау жалғасып жатыр. Алғашқы аптада еліміздің әр өңірінен 2,6 мыңнан астам мұғалім мен тәрбиеші өз өтінімдерін жолдап үлгерді.
Құжат қабылдау 12 қыркүйекте басталып, 2022 жылғы 22 қыркүйекке дейін жалғасады. Байқауға мектепке дейінгі, орта, техникалық және кәсіптік білім беру ұйымдарының педагогтері қатыса алады. Жеңімпаздар 3 млн теңге көлемінде сыйақы алады. Былтыр еліміздің әр өңірінен 64 мұғалімнің әрқайсысы 3 млн теңгеден алған болатын.
«Үздік педагог» атағының иегерлеріне 3 млн теңге көлеміндегі ақшалай сыйақы ғана емес, төсбелгілер де беріледі.
Байқау ережелері туралы қосымша ақпаратты Оқу-ағарту министрлігінің сайтынан табуға болады.
