Тәуелсіздіктің 30 жылдығына орай салынған Түркістан облысындағы су жаңа мектептің қабырғалары жарылып жатыр

19 қыркүйек 2022, 17:39

346

Түркістан облысы Өндіріс ауылында су жаңа мектеп апатты жағдайда тұр. 200 орындық білім ошағының қабырғалары қирап, құлап жатыр, деп хабарлайды Opennews.kz ақпарат агенттігі.

Өндіріс ауылындағы бұл мектептің кадрлерін ауыл тұрғындары түсірген. Көріп тұрғандарыңыздай ғимараттың қабырғасы қақ айрылып, бірнеше жерден жарылып кеткен. Ауыл халқының сөзінше, Ақпарақ мектебінің барлық бөлмесі осындай күйде екен.

200 орындық білім ұясы өткен жылы желтоқсан айында пайдалануға беріліпті. "Тәуелсіздіктің 30 жылдығына тарту ретінде берілген бұл мектептің лентасын аудан әкімінің өзі салтанатты түрде қиып кеткен" дейді тұрғындар. Алайда, содан бері мұнда бір күн де бала оқымаған көрінеді. Себебі, жап-жаңа мектептің ғимараты шәкірт қабылдап, білім беруге жарамсыз әрі мұнда кіру қауіпті.

"Сонда мынау қабырға мен мына қабырға жерде құлап жатқан еді. Кейін ішіне кіріп көрдім. Мына қабырғаның астында іргетасы болған жоқ. Іргетасы жоқ мынаның астында. Сәл дұрыс соғылмаған ба, іргетасы сәл арыда, өзі беріде соғылған топырақтың бетіне", – дейді Өндіріс ауылының тұрғыны Маржан Байымбетова.

Мектеп ресми түрде берілгеннен бері де қабырғалары бірнеше рет жарылыпты. Ал жауаптылар оны гипсокартонмен жамап, жауып қойған деп күйініп отыр тұрғындар.

Тапсырыс беруші облыстық құрылыс басқармасы нысанды былтыр қабылдап алған көрінеді. Басқарма маманының айтуынша, анықталған кемшіліктер түзетілген.

"Сарапшының бір емес үш рет қорытындысы алынды. Енді сол нәтижесіне қарап ары қарай жұмыс жүргізіліп жатыр", – дейді Қазығұрт аудандық құрылыс бөлімінің бас маманы Ерлан Байкөбеков.

Ал аудандық білім бөлімінің басшысы ауыл балалары екінші тоқсаннан бастап осы мектепте оқитынын айтады.

"Бұрын қабылдау актісі өткен кезде апаттық жағдай боп танылған. Одан кейін қазір бізде эксперттің қорытындысы бар "ғимарат пайдалануға жарамды" деген. Соның аясында қазір тиісті құжаттары реттеліп жатыр", – дейді Қазығұрт ауданы адами әлеуетті дамыту бөлімінің басшысы Асан Үйсінбаев.

Дегенмен, бөлім басшысы жертөледегі жырықтарды өз көзімен көргеннен кейін, құрылыс сапасына қайта сараптама жасатып, балаларды оқытуды кейінге қалдыруы мүмкін екенін атап өтті.

Алайда, елдімекен тұрғындары қашан болса да "балаларымызды мұнда оқытпаймыз" деп отыр. Себебі, ағын судың жолына салынған білім ошағы алғашқы қардан соң-ақ құлап, балаларымызды басып қала ма деп қорқады.