Қызылордада ойын алаңындағы сырғанақ 2 жасар баланың саусағын жұлып әкетті
2 597
Қызылордада екі жасар баланың саусағы ойын алаңындағы сырғанаққа қысылып, жұлынып қалды, - деп хабарлайды "Opennews.kz" ақпарат агенттігі.
Қаламыздың сол жағалауда орналасқан көпқабатты тұрғын үйлердің ауласындағы балаларға арналған сырғанақ екі жасар баланың саусағын жұлып әкеткен.
Бұл туралы зардап шеккен баланың әкесі әлеуметтік желіде жариялады.
"Екіге толмаған ұлым сырғанаймын деп аяқ асты жарты саусағынан айырылды. Сырғанақтың жартысы профильді қаңылтырдан жасалған. Оның саусағы сынған жеріне кіріп кеткен. Қан тоқтаусыз ағып жатты. Ол жерден әрең шығардық. Қазір бала ауруханада, ота жасалды. 15 күннен кейін дәрігерлер саусақты қалпына келтіру үшін тағы бір ота жасайды . Бұл жағдайға кім кінәлі және бұған кім жауап береді? Балаларға арналған сырғанақты профильді қаңылтырдан жасауға бола ма? Тағы да балалар зардап шекпей тұрғанда жауаптылардан жөндеуді талап етеміз!» - деп жазды зардап шеккен баланың әкесі.
Бұл балалар алаңының құрылысы 2019 жылы жобалық-сметалық құжаттамаға сәйкес «Авангард» ЖШС жүргізіп, 2021 жылы аяқталған.
Желідегі жарияланым бойынша Қызылорда қаласының тұрғын үй-коммуналдық шаруашылығы, жолаушылар көлігі, автомобиль жолдары және тұрғын үй инспекциясы бөлімінің мамандары былайша жауап қалдырды:
"Қаладағы ойын алаңдарын күтіп ұстайтын мердігер мекемемен аталған ойын алаңындағы ақауды қалпына келтіру жұмыстары жүргізіледі", - деп жазды.
