ЖАЛАҒАШ КЕНТІНІҢ ӘКІМІ САЙЛАНДЫ
ЖАЛАҒАШ КЕНТІНІҢ ӘКІМІ САЙЛАНДЫ
Бүгін аудан әкімі Ардақ Ибраимовтың төрағалығымен аудан активінің қатысуымен маңызды кадрлық өзгеріс таныстырылды. Жиын барысында Жалағаш кенті әкімінің жаңа лауазым иесі ресми түрде таныстырылып, аудандық деңгейдегі сайлау қорытындысы жария етілді.
Қазақстан Республикасының «Жергілікті мемлекеттік басқару және өзін-өзі басқару туралы» Заңына сәйкес және аудандық сайлау комиссиясының шешімі негізінде Жапбасбаев Қайрат Ғалиұлы Жалағаш кентінің әкімі болып сайланды. Бұл шешім жергілікті өзін-өзі басқару жүйесін жетілдіру және тұрғындардың сенімін арттыру мақсатында өткізілген ашық сайлау рәсімінің нәтижесі болып табылады.
Жиында аудан әкімі жаңадан сайланған кент әкімін аудан активіне таныстырып, оған жаңа қызметінде табыс тіледі. Сонымен қатар алдағы уақытта кенттің әлеуметтік-экономикалық дамуын қамтамасыз ету бағытында бірқатар нақты міндеттер жүктелді.
Ардақ Ибраимов өз сөзінде жергілікті басқару жүйесіндегі жауапкершіліктің жоғары екенін атап өтіп, кент әкіміне халықпен тығыз жұмыс істеу, тұрғындардың ұсыныс-пікірлерін ескеру және күнделікті мәселелерді дер кезінде шешу қажеттігін ескертті.
– Қайрат Ғалиұлы мемлекеттік қызметте мол тәжірибе жинақтаған білікті маман. Әр түрлі салаларда жауапты
қызметтер атқарып, басқарушылық қабілетін көрсете білді. Ендігі міндет – кенттің дамуына серпін беріп, тұрғындардың өмір сүру сапасын арттыруға бағытталған нақты нәтижелерге қол жеткізу, – деді аудан әкімі.
Аудан басшысы жаңа әкімге абаттандыру, көгалдандыру, жарықтандыру, санитарлық тазалық, инфрақұрылымды жаңғырту және қоғамдық тәртіпті сақтау бағыттарында жүйелі жұмыстар жүргізу қажеттігін ерекше атап өтті. Сонымен қатар тұрғындармен тұрақты кездесу өткізіп, ашық диалог орнату – басты талаптардың бірі екенін жеткізді.
Жиында аудандық сайлау комиссиясының төрағасы Шарабан Қалыбаев сайлау қорытындысымен таныстырып, рәсімнің заң талаптарына сәйкес өткенін атап өтті. Ол жаңадан сайланған әкімге ресми куәлігін табыстап, қызметіне сәттілік тіледі.
Жиын барысында аудан активінің өкілдері де сөз алып, жаңа әкімге сенім білдіріп, кенттің дамуы жолында бірлесе жұмыс істеуге дайын екендіктерін жеткізді. Олар жергілікті басқару жүйесіндегі сабақтастық пен тұрақтылықтың сақталуы – өңір дамуы үшін маңызды екенін атап өтті.
Қайрат Ғалиұлы Жапбасбаев 1987 жылы дүниеге келген. Жоғары білімді. Ол Павлодар құқық және қаржы колледжін және Қорқыт Ата атындағы Қызылорда мемлекеттік университетін «заңгер», «құқықтану» мамандықтары бойынша тәмамдаған.
Еңбек жолын 2010 жылы аудандық тұрғын үй-коммуналдық шаруашылық, жолаушылар көлігі және автомобиль жолдары бөлімінде бас маман болып бастаған. Осы кезеңнен бастап ол мемлекеттік қызмет жүйесінде тәжірибе жинақтап, түрлі жауапты лауазымдарда еңбек етті.
2017–2025 жылдар аралығында аудан әкімі аппаратының ұйымдастыру-бақылау, мемлекеттік-құқықтық жұмыстар бөлімдерінде, аудандық құрылыс, сәулет және қала құрылысы бөлімінде басшылық қызметтер атқарды. Сонымен қатар аудан әкімі аппаратының басшысы ретінде де жауапты міндеттерді абыроймен орындады.
2025 жылдан бастап аудандық кәсіпкерлік және өнеркәсіп бөлімінің басшысы қызметін атқарып, өңірдің экономикалық дамуына үлес қосты. Оның мемлекеттік қызметтегі көпжылдық тәжірибесі мен ұйымдастырушылық қабілеті жаңа лауазымда тиімді жұмыс істеуге мүмкіндік береді деп күтілуде.
Аудан әкімі Ардақ Ибраимов жиын соңында жаңа әкімге нақты міндеттер жүктеп, жұмыстың басты бағыты халықтың әл-ауқатын арттыру екенін тағы да атап өтті.
– Кенттің дамуы – ортақ жауапкершілік. Әрбір атқарылған жұмыс халықтың өмір сапасына тікелей әсер етеді. Сондықтан барлық бастамалар жүйелі, ашық және нәтижелі болуы тиіс, – деді аудан басшысы.
Жиын қорытындысында аудан әкімі мен актив мүшелері жаңадан сайланған кент әкіміне сәттілік тілеп, алдағы жұмысына қолдау білдірді.
Жалағаш кентінің жаңа әкімінің қызметке келуі жергілікті басқару жүйесіндегі маңызды қадам ретінде бағаланып, тұрғындармен тиімді жұмыс істеуге және кенттің әлеуметтік-экономикалық дамуын жаңа деңгейге көтеруге бағытталған бастама ретінде атап өтілді.
