ҚАЛА ӘКІМІ ЖАСТАР ОРТАЛЫҒЫНДА БОЛДЫ

25 қараша 2024, 10:28

2 565

Қала әкімі Нұржан Ахатов және қалалық мәслихат депутаты Ділмұхамед Абызов «QOSYL» қалалық жастар ресурстық орталығына барып, жұмысымен танысты, - деп хабарлайды "Opennews.kz" ақпарат агенттігі.

Жастар мен жастар ұйымдарын қолдау және олардың қызметін дамыту үшін қызмет көрсететін орталықтың жұмысымен мекеме директоры Медет Жорабек кеңінен таныстырып, ұсыныс-тілектерін жеткізіп, алдағы жоспарларымен бөлісті.

Жастармен еркін форматта пікір алмасқан қала әкімі Нұржан Сәбитұлы: «Орталыққа келген жастарды кәсіпкерлікке ынталандырып, жұмысшы мамандықтарды көбірек насихаттау қажет. Біз Сіздерден әрдайым креативті ұсыныс, жаңа идеялар күтеміз. Бастамаларыңызды әрқашан қолдауға дайынбыз», - деді.

Кездесуде қалалық мәслихат депутаты Ділмұхамед Абызов орталық басшысының ұсынысына сәйкес, 30-ға жуық жасты тұрақты жұмыспен қамтуға дайын екендігін жеткізді. Алдағы уақытта кәсіпкерлерді жұмылдырып, жастарды жұмыспен қамтуға бағытталған шаралар жүзеге асырыла бермек.

Айта кету керек, «QOSYL» брендімен танылған орталықта 8 маман жұмыс істейді. Жыл басынан бері орталықтың қызметіне 7125 жас жүгінген, 408 іс-шара өткізілген.

Бұл шара барысында қала басшысы жастардың түрлі мәселелерін тыңдап, олардың ұсыныстарын қабылдады. Әкім жастарға әлеуметтік қолдау, кәсіпкерлік және білім саласындағы мүмкіндіктер туралы ақпарат беріп, Қызылорда қаласының дамуы мен жастардың рөлі туралы сөз қозғады.

Кездесу жастарға жаңа мүмкіндіктер мен шығармашылық бастамаларды дамытуда ынталандыру мақсатында ұйымдастырылды. Сонымен қатар, әкім жастардың қоғамдық өмірге белсене араласуын, еңбек нарығында өз орнын табуын және қалада тұрақты даму үшін жастардың күшін біріктіру қажеттілігін атап өтті.

Осындай кездесулер жастардың қоғамдағы орнын нығайтуға, олардың әлеуметтік белсенділігін арттыруға және қаладағы жастар мәселелеріне назар аударуға мүмкіндік береді.