Қызылордада жылу электр орталығы тұтынушылардың ақшасын қайтарып берді
Қызылорда облысында жылу қызметін көрсетуші кәсіпорындар сыртқы ауаның нақты температурасына сәйкес жылу жеткізбегені үшін тұтынушыларға қаржылай қайта есеп жүргізді. Бұл туралы ҚР Ұлттық экономика министрлігі Табиғи монополияларды реттеу комитетінің Қызылорда облысы бойынша департаменті мәлімдеді, - деп хабарлайды "Opennews.kz" ақпарат агенттігі.
Аталған департаменттің мәліметінше, тексеру барысында бірқатар жылумен жабдықтаушы ұйымдардың қызмет сапасында жеткіліксіз жылу беру фактілері анықталған. Осыған байланысты жылу қызметін ұсынған мекемелер — «Қызылорда жылу электр орталығы», оның «Қазалы-Теміржол жылу» филиалы және «Теміржол су-Қызылорда» ЖШС тұтынушыларға артық алынған төлемді қайтаруға міндеттелді.
Қайтарылатын қаржының жалпы сомасы қосымша құн салығымен бірге 24 миллион теңгеге жуық. Бұл сома 2025 жылғы қазан айында тұтынушыларға берілетін түбіртекте көрініс табады — яғни келесі айдағы төлем азаяды.
Сонымен қатар, жылу есептегіші орнатылмаған тұтынушыларға да қайта есептеу жүргізілген. Бұл өз кезегінде, барлық тұтынушының құқығын қорғау және әділ тарифтік саясат жүргізу бағытындағы оң қадамдардың бірі болып отыр.
Мамандар жылу беру маусымында нақты температура көрсеткіштеріне сәйкес жылу сапасын бақылау әрі тарифтің әділдігін қамтамасыз ету жұмыстары жалғасатынын жеткізді.
