Қызылорда облысында интернет инфрақұрылымы кеңейіп, жылу маусымында өрт қауіпсіздігі қамтамасыз етілуде
Бүгін ҚР Премьер-министрі Олжас Бектеновтің төрағалығымен Үкімет отырысы өтті. Күн тәртібінде ақпараттық және телекоммуникациялық инфрақұрылымды дамыту және жылу беру маусымындағы өрт қауіпсіздігі шаралары мәселелері қаралды. Отырысына облыс әкімдері селекторлық режимде қатысты, соның ішінде Қызылорда облысының әкімі Нұрлыбек Нәлібаев өңірдегі атқарылған жұмыстар туралы баяндады, - деп хабарлайды "Opennews.kz" ақпарат агенттігі.
Ауылдық елді мекендер кең жолақты интернетпен қамтылуда
Қызылорда облысында цифрландыру мен байланыс инфрақұрылымын дамыту бағытында жүйелі жұмыстар жүргізіліп келеді. Бүгінгі таңда аймақтағы 223 ауылдық елді мекеннің 214-і кең жолақты интернетке қосылған, ал қалған 9 елді мекенде тиісті жұмыстар жалғасуда.
Сонымен қатар, 208 ауылда мобильді интернет бар. Қалған 15 елді мекен 2027 жылға дейін спутниктік байланыс арқылы интернетке қосылмақ.
Үкімет отырысында айтылғандай, «Қолжетімді интернет» ұлттық жобасы аясында:
- 73 елді мекендегі 111 мемлекеттік мекемеге (оның ішінде 21 әкімдік, 44 мектеп, 45 аурухана және 1 метеостанция) талшықты-оптикалық байланыс желісі тартылады;
- 129 ауылда интернетті әр үйге дейін жеткізу үшін «соңғы миль» жобасы субсидияланады.
Жыл соңына дейін Қызылорда қаласында 5G технологиясы енгізіліп, Kcell және Tele2 байланыс операторларының 150 базалық станциясы іске қосылады. Бұл облыс орталығында жоғары жылдамдықтағы интернет сапасын едәуір арттырады.
Жол бойындағы байланыс сапасы артады
Цифрлық инфрақұрылымның маңызды бөлігі ретінде облыс аумағындағы ірі көлік дәліздерінде де ұялы байланыс сапасын күшейту көзделген.
Атап айтқанда, «Қызылорда – Жезқазған» және «Батыс Еуропа – Батыс Қытай» халықаралық автожолдарының бойында 9 антенна-діңгек орнату жоспарлануда. Бұл жоба жүзеге асқанда, жол бойындағы елді мекендер мен автокөлік жүргізушілерінің байланыс сапасы мен интернет қолжетімділігі айтарлықтай жақсарады.
Өрт қауіпсіздігі – қатаң бақылауда
Жылу беру маусымы басталғаннан бері Қызылорда облысында өрт немесе газдан улану оқиғалары тіркелмеген.
Төтенше жағдайлардың алдын алу мақсатында сала мамандары мен ерікті жастардан құралған топтар 14 482 тұрғын үйді аралап, тұрғындарға түсіндіру және профилактикалық жұмыстар жүргізді.
Сондай-ақ, қауіпсіздік талаптарын күшейту мақсатында:
- Бұған дейін бу қазандығы жапсарлас орналасқан 12 әлеуметтік нысанның 11-інде қазандықтар бөлек ғимаратқа шығарылды, тағы бір нысандағы жұмыс аяқталу үстінде;
- Жергілікті бюджет есебінен 484 әлеуметтік аз қамтылған және көпбалалы отбасының үйіне көмірқышқыл газы мен өртке қарсы заманауи дабыл құрылғылары орнатылды.
Қызылорда облысында ақпараттық және инженерлік инфрақұрылымды дамыту жұмыстары заманауи технологиялар мен қауіпсіздік стандарттарына сай жүргізілуде.
Ауылдық аймақтардың интернетпен қамтылуы, 5G желісінің енгізілуі және жол бойындағы байланыс сапасының жақсаруы – өңірдің цифрлық теңдігін қамтамасыз етудің маңызды қадамы. Ал жылу маусымындағы өрт қауіпсіздігі шаралары – тұрғындардың өмірі мен тұрмыс қауіпсіздігін сақтау бағытындағы нақты нәтижелі жұмыстардың көрінісі.
