Аудан әкімі «AMANAT» партиясы филиалында азаматтарды жеке мәселелері бойынша қабылдады

Бүгін Жалағаш ауданының әкімі Ардақ Ибраимов «AMANAT» партиясының аудандық филиалында кезектілік тәртібімен аудан тұрғындарын жеке мәселелері бойынша қабылдады. Қабылдауға әртүрлі әлеуметтік, тұрмыстық және коммуналдық мәселелері бар тұрғындар келіп, өз өтініштері мен сұрақтарын жолдады, - деп хабарлайды "Opennews.kz" ақпарат агенттігі.

Аудан әкімі әрбір тұрғынның мәселесін мұқият тыңдап, олардың маңызды және шұғыл сұрақтарының бір бөлігін сол жерде жауапты сала басшыларының қатысуымен қарады. Жеке өтініштердің қалған бөлігі тиісті мекемелерге жолданып, заң аясында шешу жолдарын қарастыруға нақты тапсырмалар берілді. Бұл тұрғындардың құқықтарын қорғау, олардың мәселелерін дер кезінде шешу және мемлекеттік қызмет көрсету сапасын арттыруға бағытталған жүйелі жұмыс екенін аудан басшысы атап өтті.

Қабылдау барысында аудан әкімдігі тұрғындарға өз өтініштерін egov.kz порталы немесе e-otinish бірыңғай базасы арқылы, сондай-ақ тікелей әкімдікке келіп жазбаша түрде беруге мүмкіндік бар екенін еске салды. Мұндай тәсілдер әкімдік пен тұрғындар арасындағы тұрақты кері байланыс орнатуға, ашықтық пен сенімділікті арттыруға қызмет етеді.

Аудан әкімі Ардақ Ибраимов қабылдауда тұрғындардың мәселелерін шешудің барлық мүмкін жолдарын қарастыруды, жауапты сала басшыларының әрекеттерін қатаң бақылауды және әр өтініштің уақытылы әрі сапалы орындалуын қамтамасыз етуді тапсырды. Сонымен қатар, азаматтардың өтініштерін заң шеңберінде қарау және шешім қабылдауда ашықтықты сақтау маңызды екені баса айтылды.

Бұл қабылдау аудан тұрғындары мен әкімдік арасындағы тұрақты өзара қарым-қатынасты нығайтуға, қоғамдағы сенім мен қоғамдық бақылауды арттыруға бағытталған маңызды іс-шара болып табылады. Аудан әкімдігі алдағы уақытта да тұрғындардың мәселелерін тыңдап, нақты іс-шаралар арқылы шешуге барынша көңіл бөлетіндігін жеткізді.