ҚЫЗЫЛОРДАДА КӨКТЕМГІ ӘСКЕРИ ҚЫЗМЕТКЕ ШАҚЫРУ НАУҚАНЫ ЖАЛҒАСУДА

17 сәуір 2026, 17:30

1 509

Көктемгі мерзімді әскери қызметке шақыру науқаны еліміз бойынша жүйелі түрде жалғасып жатыр. Бұл бағыттағы түсіндіру және ақпараттандыру жұмыстары жастар арасында кеңінен жүргізілуде. Соның аясында қала әкімдігі, Жастар ресурстық орталығы және Қорғаныс істері жөніндегі басқарма бірлесіп, Абылайхан атындағы жоғары колледж студенттерімен мазмұнды кездесу өткізді.

Іс-шараның негізгі мақсаты – жастарға әскери қызметтің мәні мен маңызын түсіндіру, отансүйгіштік рухты қалыптастыру және мерзімді әскери қызметке шақыру тәртібі туралы толық ақпарат беру болды. Кездесу барысында мамандар әскер қатарында қызмет етудің тәртібі, талаптары, медициналық тексеруден өту кезеңдері және шақыру науқанының ұйымдастырылу барысы жөнінде жан-жақты мәлімет берді.

Сонымен қатар, әскери қызметтің жас азаматтар үшін беретін мүмкіндіктері де кеңінен айтылды. Атап айтқанда, әскери борышын өтеу арқылы тәртіп пен жауапкершілікті қалыптастыру, дене дайындығын жетілдіру, жаңа дағдыларды меңгеру және мемлекет тарапынан қарастырылған әлеуметтік жеңілдіктер туралы түсіндірілді.

Кездесу барысында студенттер өздерін қызықтырған сұрақтарын қойып, сала мамандарынан нақты әрі түсінікті жауаптар алды. Жастар әскери қызметтің қазіргі қоғамдағы рөлі, әскердегі күн тәртібі, қызмет ету жағдайлары және болашақта әскери оқу орындарына түсу мүмкіндіктері жөнінде белсенді пікір алмасты.

Мамандардың айтуынша, мұндай кездесулер жас буынның әскери қызметке деген көзқарасын қалыптастыруда және олардың патриоттық сезімін арттыруда маңызды рөл атқарады. Әскер – тек міндет қана емес, сонымен бірге азаматтық кемелденудің, тәртіп пен жауапкершіліктің мектебі екені ерекше атап өтілді.

Іс-шараны ұйымдастырушылардың мәліметінше, көктемгі шақыру науқаны аясындағы түсіндіру жұмыстары алдағы уақытта да жалғасады. Әртүрлі оқу орындары мен жастар орталықтарында осындай кездесулер өткізіліп, жастарға әскери қызмет туралы толық ақпарат беру жұмыстары жүйелі түрде жүргізілмек.