ҚЫЗЫЛОРДА ОБЛЫСЫНДА АРНАЙЫ ИНВЕСТИЦИЯЛЫҚ КЕҢЕС ОТЫРЫСЫ ӨТТІ

11 мамыр 2026, 14:30

1 507

Бүгін Қазақстан Республикасының Премьер-министрі Олжас Бектенов төрағалығымен арнайы инвестициялық кеңес отырысы өтті. Жиында еліміздегі инвестициялық ахуалды жақсарту, инвесторлардың құқықтарын қорғау, ірі инвестициялық жобаларды іске асыру барысында туындайтын мәселелерді шешу және мемлекеттік органдар мен бизнес қауымдастық арасындағы өзара іс-қимылды жетілдіру мәселелері кеңінен талқыланды.

Кеңес отырысына орталық мемлекеттік органдардың басшылары, құқық қорғау органдарының өкілдері, өңір әкімдері, ұлттық компаниялар мен инвесторлар қатысты. Күн тәртібінде инвесторлар мен кәсіпкерлердің өтініштері, инвестициялық жобаларды жүзеге асыру кезінде кездесетін кедергілер, Бас прокуратура тарапынан енгізілген ұсыныстар және инвестициялық процестерді жеңілдету бағытындағы нақты шаралар қаралды.

Жиында инвестиция тарту – экономиканың тұрақты өсімін қамтамасыз етудің басты бағыттарының бірі екені атап өтілді. Осыған сәйкес өңірлерде қолайлы инвестициялық климат қалыптастыру, инфрақұрылымды дамыту, мемлекеттік қолдау тетіктерін жетілдіру және шетелдік инвесторлармен тиімді әріптестік орнату мәселелеріне ерекше көңіл бөлінуде.

Қызылорда облысында да инвестициялық саясат жүйелі түрде жүзеге асырылып келеді. Өңірде соңғы жылдары жаңа өндіріс орындарын ашу, өнеркәсіптік әлеуетті арттыру, экономиканы әртараптандыру және инфрақұрылымды дамыту бағытында ауқымды жұмыстар атқарылуда. Нәтижесінде аймақта қолайлы инвестициялық орта қалыптасып, ірі жобаларды жүзеге асыруға мүмкіндік жасалуда.

Бүгінде өңір экономикасын әртараптандыру мақсатында алдағы үш жылда 48 инвестициялық жобаны жүзеге асыру жоспарланған. Бұл жобалар іске қосылған кезде 10 308 жаңа жұмыс орны ашылады деп күтілуде. Жаңа өндірістердің ашылуы халықты тұрақты жұмыспен қамтып қана қоймай, облыстың өнеркәсіптік және экономикалық әлеуетін арттыруға ықпал етеді.

Аталған жобалар негізінен өңдеу өнеркәсібі, құрылыс индустриясы, агроөнеркәсіп кешені, энергетика, көлік-логистика және қызмет көрсету салаларын қамтиды. Сонымен қатар, өңірде заманауи технологияларды енгізу, экспортқа бағытталған өндірістерді дамыту және инновациялық жобаларды қолдау бағытындағы жұмыстар да күшейтілуде.

Биыл Қызылорда облысында 21 инвестициялық жобаны іске қосу жоспарланған. Қазіргі таңда бірқатар жобалар бойынша құрылыс-монтаж жұмыстары жүргізілуде. Жыл соңына дейін іске қосылатын өндіріс орындары өңірдің әлеуметтік-экономикалық дамуына тың серпін береді деп күтілуде.

Сонымен қатар, жалпы құны 1 трлн теңгені құрайтын 14 ірі жобаның құрылысы басталды. Бұл жобалар энергетика, құрылыс индустриясы, өңдеу саласы және инфрақұрылым бағыттарын қамтиды. Қазіргі таңда 5 инвестициялық жобаның құрылысы белсенді жүргізілуде. Ал жыл соңына дейін тағы 9 жобаны іске асыру жоспарланып отыр.

Инвестициялық жобалардың жүзеге асырылуы облыс экономикасының тұрақты дамуына, өндіріс көлемінің артуына және жаңа технологиялардың енгізілуіне оң әсер етеді. Сонымен бірге жаңа өндіріс орындары жергілікті кәсіпкерлердің әлеуетін арттырып, шағын және орта бизнестің дамуына да мүмкіндік береді.

Жиында Мемлекет басшысы Қасым-Жомарт Тоқаевтың Қатар мемлекетіне жасаған жұмыс сапары аясында жүзеге асырылып жатқан маңызды жобалардың бірі – Қызылорда қаласында салынатын қуаттылығы 1 100 мегаватт болатын бу-газ қондырғысының құрылысы туралы да айтылды.

Аталған жоба өңірдің энергетикалық қауіпсіздігін нығайтуға және электр энергиясына деген сұранысты толық қамтамасыз етуге бағытталған. Қазіргі таңда жоба үшін 250 гектар жер телімі бөлініп, техника-экономикалық негіздемесін әзірлеу жұмыстары жүргізілуде.

Мамандардың айтуынша, жаңа бу-газ қондырғысы іске қосылғаннан кейін өңірдің энергетикалық әлеуеті айтарлықтай артып, өндірістік кәсіпорындарды тұрақты энергиямен қамтамасыз етуге мүмкіндік береді. Сонымен қатар, жоба жаңа жұмыс орындарын ашуға және өңірдің инвестициялық тартымдылығын арттыруға ықпал етеді.

Қызылорда облысында инвестициялық саясаттың 2030 жылға дейінгі тұжырымдамасына сәйкес арнайы өңірлік инвестициялық штаб құрылған. Штабтың негізгі мақсаты – инвесторлармен тиімді байланыс орнату, жобаларды сүйемелдеу, туындаған мәселелерді жедел шешу және инвестициялық ахуалды жақсарту.

Өткен жылы өңірлік инвестициялық штабтың 9 отырысы өткізіліп, нәтижесінде 30 инвестициялық жобаға нақты қолдау көрсетілді. Атап айтқанда, жер телімдерін бөлу, инфрақұрылым жүргізу, рұқсат құжаттарын рәсімдеу және мемлекеттік қолдау шараларын ұсыну мәселелері шешімін тапқан.

Ал биыл штабтың 3 отырысы өткізіліп, 12 инвестициялық жоба бойынша нақты шешім қабылданды. Бұл жұмыстар инвесторлардың мәселелерін жедел қарауға және жобаларды іске асыру мерзімін қысқартуға мүмкіндік беруде.

Сонымен қатар, өңірде инвесторларға қолайлы жағдай жасау мақсатында мемлекеттік қолдау тетіктері кеңінен пайдаланылуда. Бүгінде 10 инвестор инвестициялық келісім-шартқа қол қойып, бірқатар жеңілдіктерге ие болды. Атап айтқанда, олар кедендік баж салығынан босатылып, жер телімі түрінде мемлекеттік гранттар алған.

Бұл шаралар инвесторлардың шығындарын азайтып, жаңа өндірістер ашуға ынталандырады. Сонымен қатар, инвестициялық жобаларды іске асыру барысында инфрақұрылымдық қолдау көрсету, инженерлік желілер тарту және әкімшілік кедергілерді азайту бағытындағы жұмыстар тұрақты түрде жүргізілуде.

Жаңа жобаларға инвестор тарту мақсатында өңірде халықаралық және республикалық деңгейде түрлі кездесулер мен бизнес-форумдар ұйымдастырылуда. Өткен кезеңде 50-ден астам офлайн және онлайн форматтағы кездесу өткізіліп, әлеуетті инвесторларға өңірдің мүмкіндіктері таныстырылды.

Кездесулер барысында өңірдің географиялық артықшылықтары, табиғи ресурстары, көлік-логистикалық әлеуеті, индустриялық аймақтары және мемлекеттік қолдау тетіктері туралы кеңінен ақпарат берілді. Бұл өз кезегінде жаңа серіктестіктер орнатуға және өңірге қосымша инвестиция тартуға мүмкіндік жасауда.

Жалпы, Қызылорда облысында инвестициялық саясатты жүйелі жүргізу нәтижесінде өңірдің экономикалық белсенділігі артып, өндірістік әлеуеті нығаюда. Инвестициялық жобалардың жүзеге асырылуы жаңа жұмыс орындарын ашуға, халықтың табысын арттыруға және өңірдің әлеуметтік-экономикалық дамуына оң әсерін тигізуде.

Жиын қорытындысында инвестициялық жобаларды іске асыру барысында туындайтын мәселелерді жедел шешу, инвесторларға қолайлы жағдай жасау және мемлекеттік органдардың жауапкершілігін күшейту бағытындағы жұмыстарды жалғастыру қажеттігі атап өтілді.

Фото: Қызылорда облысы әкімінің баспасөз қызметі