ҚАЗАЛЫДА «АУЫЛ АМАНАТЫ» ЖОБАСЫ АЯСЫНДА АУДАН ӘКІМІ КӘСІПКЕРЛЕРДІҢ ЖҰМЫСЫМЕН ТАНЫСТЫ
Қазалы ауданында мемлекет тарапынан жүзеге асырылып жатқан «Ауыл аманаты» жобасы аясында кәсіпкерлік саласы қарқынды дамып келеді. Әсіресе ауыл тұрғындарының табысын арттыруға, жаңа жұмыс орындарын ашуға және халықты сапалы азық-түлік өнімдерімен қамтамасыз етуге бағытталған жобалардың нәтижесі айқын байқалуда. Осы бағыттағы жұмыстармен танысу мақсатында Қазалы қаласында жеңілдетілген несие алып, жылыжай шаруашылығын қолға алған кәсіпкерлердің жұмыс барысы қаралды.
Алдымен жеке кәсіпкер Піржанов Әділжанның жылыжай кешеніне арнайы барып, кәсіптің қазіргі ахуалымен таныстық. Кәсіпкер «Ауыл аманаты» жобасы аясында жеңілдетілген несие алып, 2025 жылдың тамыз айында жалпы құны 5 миллион теңгені құрайтын жобасын іске қосқан. Бүгінде жылыжай кешенінде қияр мен қызанақ өнімдері өсіріліп, алғашқы өнімдері халыққа ұсынылуда.
Кәсіпкердің айтуынша, жылыжай шаруашылығын бастау – көп ізденіс пен еңбек талап ететін сала. Дегенмен мемлекет тарапынан көрсетілген қолдау мен жеңілдетілген несиенің арқасында өз кәсібін бастап, бүгінде тұрақты табыс көзін қалыптастырып отырғанын жеткізді. Қазіргі таңда жылыжайда өсірілген өнімдер жергілікті тұрғындардың сұранысына ие болып, нарыққа тұрақты түрде шығарылуда. Сонымен қатар жоба аясында бір тұрақты жұмыс орны ашылып, жергілікті тұрғын жұмыспен қамтылған. Бұл ауылдық жерлердегі жұмыссыздықты азайтып, халықтың әл-ауқатын арттыруға оң әсерін тигізуде. Мұнан кейін жеке кәсіпкер Тілеуов Ерболаттың жылыжай кешенінің жұмысымен таныстық. Кәсіпкер 2026 жылдың шілде айында құны 9,6 миллион теңгені құрайтын жобасын іске қосқан. Қазіргі уақытта жылыжайда қияр өнімдері өсіріліп, халыққа ұсынылуда. Ерболат Тілеуов бүгінде екінші жыл қатарынан өнім алып отырғанын айтып, жылыжай кәсібінің тиімділігін ерекше атап өтті. Оның айтуынша, сапалы әрі табиғи өнімге сұраныс жоғары болғандықтан, жылыжай шаруашылығын кеңейту жоспарда бар. Кәсіпкер алдағы уақытта қосымша жылыжайлар салып, өнім көлемін арттыруды көздеп отыр.
Қазіргі таңда екі кәсіпкердің де өнімдері Әйтеке би кенті мен Қазалы қаласының тұрғындары арасында үлкен сұранысқа ие. Жергілікті жерде өсірілген көкөніс өнімдері сапасымен ерекшеленіп, тұрғындарды жаңа әрі табиғи өнімдермен қамтамасыз етуде. Бұл өз кезегінде өңірдің азық-түлік қауіпсіздігін қамтамасыз етуге де үлес қосып отыр. Кездесу барысында мемлекет тарапынан кәсіпкерлерге алдағы уақытта да жан-жақты қолдау көрсетілетіні айтылды. Атап айтқанда, кәсібін кеңейтуге ниетті азаматтарға жеңілдетілген несие беру, инфрақұрылымдық қолдау көрсету және кәсіпкерлікті дамыту бағытындағы бағдарламалар жалғасын табатыны жеткізілді. Сонымен қатар кәсіпкерлердің бастамаларына сәттілік тілеп, олардың еңбегі аудан экономикасының дамуына үлкен үлес қосып отырғаны атап өтілді. Өз кезегінде кәсіпкерлер мемлекет тарапынан көрсетіліп жатқан қолдауларға ризашылықтарын білдірді. Олар «Ауыл аманаты» жобасының арқасында кәсібін бастап, бүгінде тұрақты табыс тауып отырғандарын жеткізді. Кәсіпкерлердің айтуынша, мұндай мемлекеттік бағдарламалар ауыл тұрғындарына үлкен мүмкіндік беріп, өз ісін бастауға жол ашуда. Айта кету керек, «Ауыл аманаты» жобасы – ауыл тұрғындарының табысын арттыруға, шағын кәсіпкерлікті дамытуға және жаңа жұмыс орындарын құруға бағытталған маңызды мемлекеттік бастамалардың бірі. Бағдарлама аясында ауыл тұрғындарына төмен пайызбен жеңілдетілген несие беріліп, олардың өз кәсібін бастауына жағдай жасалуда.
Соңғы жылдары бұл жоба Қазалы ауданында да оң нәтижесін көрсетіп келеді. Бүгінге дейін аудан бойынша 200-ден астам азамат «Ауыл аманаты» жобасы аясында өз кәсібін бастап, түрлі бағыттарда жұмыс жүргізуде. Олардың қатарында мал шаруашылығы, құс өсіру, жылыжай кәсібі, наубайхана, қызмет көрсету саласы және шағын өндіріс орындары бар. Бұл кәсіптердің дамуы аудан экономикасының өркендеуіне, халықтың әл-ауқатының артуына және азық-түлік өнімдерінің көлемін көбейтуге ықпал етуде. Әсіресе жергілікті жерде өндірілген өнімдердің нарыққа шығуы тұрғындарды сапалы әрі қолжетімді тауарлармен қамтамасыз етуге мүмкіндік береді. Мемлекет тарапынан 2023 жылдан бері аталған жобаларды жүзеге асыруға жалпы көлемі 1 миллиард 581 миллион теңге қаржы бөлінген. Бұл қаржы ауыл тұрғындарының кәсіпкерлік бастамаларын қолдауға және жаңа жобаларды іске асыруға бағытталуда. Нәтижесінде көптеген азамат өз кәсібін ашып, тұрақты табыс табуға мүмкіндік алып отыр. Мамандардың айтуынша, ауылдық жерлерде жылыжай шаруашылығын дамыту – өте тиімді бағыттардың бірі. Себебі көкөніс өнімдеріне сұраныс жыл бойы тұрақты сақталады. Сонымен қатар жылыжайлар жергілікті нарықты жаңа өніммен қамтамасыз етіп қана қоймай, импорттық өнімдерге тәуелділікті азайтуға мүмкіндік береді. Қазіргі таңда аудан көлемінде ауыл шаруашылығы мен кәсіпкерлікті дамытуға ерекше көңіл бөлінуде. Мемлекеттік бағдарламалар аясында тұрғындарға түрлі қолдау шаралары ұсынылып, жаңа жобаларды іске асыруға жағдай жасалуда. Бұл бағыттағы жұмыстар алдағы уақытта да жалғасын тауып, ауыл тұрғындарының әлеуметтік жағдайын жақсартуға ықпал етпек. Жалпы, Қазалы ауданындағы жылыжай шаруашылығын дамыту бағытындағы жобалар – ауыл кәсіпкерлігінің дамып келе жатқанының айқын дәлелі. Мұндай бастамалар ауыл халқының табысын арттырып қана қоймай, өңірдің әлеуметтік-экономикалық дамуына да серпін беруде. Сонымен қатар, жергілікті кәсіпкерлердің белсенділігі мен еңбекқорлығының арқасында аудан экономикасы жаңа деңгейге көтеріліп келеді.
