ОБЛЫС ДЕЛЕГАЦИЯСЫ WORLD URBAN FORUM-13 ХАЛЫҚАРАЛЫҚ ФОРУМЫНА ҚАТЫСТЫ

Кеше, 17:00

1 507

Әзербайжан Республикасының Баку қаласында өткен Дүниежүзілік урбан форумының 13-сессиясына Сыр өңірінің делегациясы қатысты.

Аталған халықаралық форум БҰҰ-Хабитат ұйымының қолдауымен ұйымдастырылып, урбанизация, тұрақты қала құрылысы, климат тұрақтылығы, экологиялық қауіпсіздік және заманауи инфрақұрылым мәселелерін талқылауға арналды. Әлемдік деңгейдегі маңызды алаңға 100-ден астам елден 20 мыңнан аса делегат жиналды. Форум жұмысына мемлекет және үкімет басшылары, халықаралық ұйымдардың өкілдері, урбанистика саласының сарапшылары, сәулетшілер, экологтар, инженерлер және инвесторлар қатысты. Іс-шара аясында заманауи қалаларды дамыту, халыққа қолайлы өмір сүру ортасын қалыптастыру, цифрлық технологияларды енгізу және климат өзгерісіне бейімделу бағытындағы халықаралық тәжірибелер ортаға салынды.

Қазақстан делегациясының құрамында Қызылорда облысының өкілдері де болды. Сыр өңірінің делегациясы форум барысында халықаралық сарапшылармен және әртүрлі елдердің өкілдерімен тәжірибе алмасып, өңірдегі тұрақты даму бағытында жүзеге асырылып жатқан жобалар туралы ақпарат ұсынды. Делегация мүшелері қала инфрақұрылымын жаңғырту, қоғамдық кеңістіктерді дамыту, экологиялық тепе-теңдікті сақтау және тұрғындарға қолайлы орта қалыптастыру мәселелері бойынша бірқатар кездесулер өткізді.
Форум барысында Қазақстан Республикасының Премьер-министрі Олжас Бектенов сөз сөйлеп, Мемлекет басшысы Қасым-Жомарт Тоқаев айқындаған урбанистикалық даму саясатының негізгі басымдықтарына тоқталды. Оның айтуынша, қазіргі таңда Қазақстанда халыққа жайлы әрі қауіпсіз орта қалыптастыру, қалаларды тұрақты дамыту және өңірлік инфрақұрылымды жаңғырту мәселелеріне ерекше назар аударылуда.

Премьер-министр өз сөзінде цифрландыру мен жасанды интеллект технологияларын урбанистика саласына енгізудің маңызын атап өтті. Сонымен қатар су қауіпсіздігі, климат тұрақтылығы, энергия тиімділігі және жасыл технологияларды дамыту мәселелері кеңінен қозғалды. Қазақстанның урбанистикалық саясаты тұрғындардың өмір сапасын арттыруға, көлік жүйесін жетілдіруге, экологиялық ахуалды жақсартуға және заманауи инфрақұрылым қалыптастыруға бағытталғаны айтылды. Форум аясында ұйымдастырылған Urban Expo халықаралық көрмесінде қатысушылар назарына Қазақстанның ұлттық павильоны ұсынылды. Экспозицияда еліміздің тұрақты және экологиялық таза қалаларды дамыту бағытындағы заманауи көзқарасы таныстырылды. Көрмеде қоғамдық кеңістіктерді жаңарту, инженерлік инфрақұрылымды жетілдіру, «ақылды қала» технологияларын енгізу және экологиялық жобаларды дамытуға арналған бастамалар қамтылды.

Қазақстан павильонында Green ID жобасына ерекше назар аударылды. Бұл бастама қалаларды көгалдандыру, климат тұрақтылығын арттыру және қалалық ортаның сапасын жақсартуға бағытталған. Жоба аясында жасыл аймақтарды көбейту, энергияны үнемдеу, атмосфералық ауаның сапасын жақсарту және тұрғындарға жайлы экожүйе қалыптастыру мәселелері қарастырылған. Сарапшылардың айтуынша, мұндай жобалар болашақта қалалардың тұрақты дамуын қамтамасыз етудің маңызды құралдарының біріне айналмақ. Сыр өңірінің делегациясы халықаралық форум барысында бірқатар шетелдік ұйымдар мен урбанистика саласының мамандарымен кездесулер өткізіп, өзара ынтымақтастық мәселелерін талқылады. Әсіресе су ресурстарын тиімді пайдалану, жасыл инфрақұрылым қалыптастыру, климаттық тәуекелдерді азайту және экологиялық тұрақтылықты қамтамасыз ету бағыттарындағы халықаралық тәжірибелерге қызығушылық танытылды.

Қызылорда облысы үшін урбанистика мен тұрақты даму мәселелері ерекше маңызға ие. Өңірде соңғы жылдары инфрақұрылымды жаңғырту, қоғамдық кеңістіктерді абаттандыру, көгалдандыру жұмыстарын күшейту және тұрғындарға қолайлы орта қалыптастыру бағытында ауқымды жобалар жүзеге асырылуда. Форум аясында алынған халықаралық тәжірибелерді Сыр өңірінде іске асыру мүмкіндіктері де қарастырылды. Айта кету керек, өткен жылы Қызылорда қаласында алғаш рет Ұлттық урбан форум ұйымдастырылған болатын. Аталған іс-шараға мемлекеттік органдардың өкілдері, халықаралық ұйымдар, сарапшылар, сәулетшілер, урбанистер және бизнес қауымдастық мүшелері қатысты. Форум барысында тұрақты қалалық даму, өңірлік инфрақұрылымды жетілдіру, тұрғын үй құрылысы, экология және көлік жүйесін дамыту мәселелері кеңінен талқыланды. Ұлттық урбан форум Қызылорда өңірінде урбанистика саласын дамытуға серпін беріп, халықаралық тәжірибе алмасуға мүмкіндік жасады. Сонымен қатар бұл алаң өңірдегі заманауи инфрақұрылым қалыптастыру, қоғамдық кеңістіктердің сапасын арттыру және экологиялық тұрақтылықты қамтамасыз ету бағытындағы бастамаларды талқылауға жол ашты. Бүгінде Қызылорда облысында тұрғындардың өмір сүру сапасын жақсарту мақсатында заманауи тұрғын үй кешендері, жаңа әлеуметтік нысандар, саябақтар мен қоғамдық кеңістіктер салу жұмыстары жалғасуда. Сонымен бірге экологиялық ахуалды жақсарту, көгалдандыру көлемін арттыру және су ресурстарын тиімді пайдалану мәселелері өңірдің даму стратегиясының негізгі бағыттарының бірі ретінде қарастырылып келеді. Дүниежүзілік урбан форумына қатысу Сыр өңірінің халықаралық ынтымақтастығын нығайтып қана қоймай, урбанистика және тұрақты даму бағытындағы жаңа тәжірибелерді зерделеуге мүмкіндік берді. Бұл өз кезегінде Қызылорда облысында заманауи, экологиялық таза және тұрғындарға қолайлы қалалық орта қалыптастыруға бағытталған жұмыстарды жетілдіруге ықпал етеді деп күтілуде.