МЕМЛЕКЕТТІК РӘМІЗДЕР КҮНІНЕ АРНАЛҒАН САЛТАНАТТЫ ШАРА ӨТТІ

Кеше, 17:30

1 504

Бүгін Қызылорда қаласындағы «Достық үйінде» Мемлекеттік рәміздер күніне арналған салтанатты іс-шара өтті. Оған облыс әкімі Мұрат Ергешбаев, облыстық мәслихат депутаттары, қоғам қайраткерлері, зиялы қауым өкілдері, ардагерлер, жастар ұйымдарының жетекшілері және қала тұрғындары қатысты.

Салтанатты жиын Мемлекеттік Әнұранның орындалуымен басталып, еліміздің көк Туы көтеріліп, Елтаңба бейнесі бейбітшілік пен бірліктің символы ретінде кеңінен дәріптелді.

Аймақ басшысы сырбойылықтарды айтулы мерекемен құттықтап, Мемлекеттік рәміздердің тәуелсіз ел үшін айрықша маңызы бар екенін атап өтті.

– Баршаңызды Мемлекеттік рәміздер күнімен шын жүректен құттықтаймын! Бұл мереке – еліміздің егемендігі мен дербестігінің, ұлттық бірегейлігіміздің айқын көрінісі. Мемлекеттік рәміздер – Тәуелсіз Қазақстанның айбыны мен рухын айқындайтын қасиетті нышандар, – деді облыс әкімі.

Аймақ басшысы өз сөзінде Мемлекет басшысы Қасым-Жомарт Тоқаевтың Мемлекеттік рәміздерге қатысты айтқан ұстанымын да атап өтті.

Президенттің пікірінше, Көк байрақ – мызғымас мемлекеттіліктің белгісі, Елтаңба – азаттықтың айшықты көрінісі, ал Әнұран – еркіндік пен елдіктің үні. Бұл үш символ әрбір азаматтың бойында мақтаныш сезімін оятып, елге деген сүйіспеншілікті күшейтеді.

Кездесуде облыс көлемінде Мемлекеттік рәміздер күніне орай өткізілген іс-шараларға да тоқталды.

Аймақтың барлық аудандары мен елді мекендерінде Мемлекеттік Ту көтеру рәсімдері ұйымдастырылып, білім беру ұйымдарында ашық сабақтар, патриоттық кездесулер, дөңгелек үстелдер мен жастар форумдары өткізілді.

Мектептерде және колледждерде оқушыларға Мемлекеттік рәміздердің тарихы, олардың қабылдану кезеңдері және маңызы туралы кең көлемде түсіндіру жұмыстары жүргізілді.

Сонымен қатар өңірдің орталық көшелерінде, алаңдарында және қоғамдық орындарында патриоттық рухты көтеруге бағытталған ақпараттық-идеологиялық шаралар ұйымдастырылды.

Облыс әкімі өз сөзінде Мемлекеттік рәміздер – тек ресми белгілер ғана емес, елдің рухани тұтастығы мен ұлттық сананың негізі екенін ерекше атап өтті.

– Тәуелсіздігіміздің тұғырын нығайтып, мемлекетіміздің беделін арттыруда әрбір азаматтың жауапкершілігі зор. Мемлекеттік рәміздерді құрметтеу – Отанды сүюдің, елге деген адалдықтың көрінісі. Сондықтан бұл құндылықтарды жас ұрпақ санасына сіңіру – ортақ міндетіміз, – деді Мұрат Нәлқожаұлы.

Мерекелік іс-шара барысында еліміздің дамуына, өңірдің әлеуметтік-экономикалық өркендеуіне және қоғамдық өмірдің түрлі салаларына елеулі үлес қосқан азаматтарды марапаттау рәсімі өтті.

Салтанатты жиында Мәдениет қайраткері Шәкизада Әбдікәрімов сөз сөйлеп, Мемлекеттік рәміздердің ұлт бірлігін нығайтудағы рөліне тоқталды. Ол өз сөзінде елдің рухани жаңғыруы мен патриоттық тәрбиенің маңызына ерекше мән берді.

Шара барысында Мемлекет басшысының Жарлығына сәйкес бірқатар азаматтар жоғары мемлекеттік наградалармен марапатталды.

Атап айтқанда, «Құрмет» ордені, «Ерлігі үшін», «Ерен еңбегі үшін» және «Шапағат» медальдары табысталды.

Бұл марапаттар ел игілігі жолында аянбай еңбек етіп жүрген азаматтардың еңбегіне берілген жоғары баға болып табылады.

Салтанатты жиында сондай-ақ ҚР Премьер-министрінің бірінші орынбасары Нұрлыбек Нәлібаевтың Алғыс хаты табысталды. Бұдан бөлек, бірқатар азаматтар Қызылорда облысының Құрмет грамотасымен, «Қызылорда облысының дамуына қосқан үлесі үшін» медалімен және облыс әкімінің Алғыс хатымен марапатталды.

Марапат иелерінің қатарында өндіріс, білім беру, денсаулық сақтау, мәдениет, спорт және қоғамдық салада еңбек етіп жүрген азаматтар бар.

Облыс әкімі марапат иелерін құттықтап, олардың еңбегі өңірдің дамуына қосылған зор үлес екенін атап өтті.

– Сіздердің еңбектеріңіз – ел дамуының нақты көрсеткіші. Әр салада табанды еңбек етіп, халық игілігі үшін қызмет ету – үлкен жауапкершілік пен биік мәртебе. Сіздерге шынайы алғысымды білдіремін, – деді аймақ басшысы.

Салтанатты шара барысында патриоттық әндер орындалып, шығармашылық ұжымдар көрермендерге мерекелік концерттік бағдарлама ұсынды.

Жастар ұйымдарының өкілдері Мемлекеттік рәміздерге құрмет көрсету, отансүйгіштік рухты қалыптастыру бағытындағы бастамаларын таныстырды.

Олар Мемлекеттік Ту мен Елтаңба бейнеленген флешмоб ұйымдастырып, ұлттық рухты дәріптейтін көріністер көрсетті.

Шара соңында қатысушылар Мемлекеттік рәміздерге құрмет көрсету – әр азаматтың қасиетті борышы екенін атап өтіп, ел бірлігін нығайту жолында бірлесе еңбек етуге шақырды.

Жалпы алғанда, Мемлекеттік рәміздер күніне арналған бұл салтанатты іс-шара өңір тұрғындарының патриоттық рухын көтеріп, елдік құндылықтарға деген құрметті арттыруға бағытталған маңызды рухани-идеологиялық шара болды.

Қызылорда облысы әкімінің баспасөз қызметі